Avropa Şurası Parlament Assambleyasının (AŞPA) faktaraşdırıcı missiyası Gürcüstanda səfərdədir.

“İki sahil” xəbər verir ki, bunu jurnalistlərə açıqlamasında Ətraf Mühitin Mühafizəsi və Təbii Sərvətlər üzrə Parlament Komitəsi sədrinin birinci müavini, parlament çoxluğunun üzvü Vladimer Bojadze deyib.

Onun sözlərinə görə, AŞPA nümayəndə heyətinin bu səfəri çox önəmlidir.

"Baş nazirlə birlikdə qərara alınıb ki, müvafiq nümayəndə heyəti ölkəyə gəlsin və vəziyyətlə yerindəcə, daha yaxından tanış olsun. Məruzəçilərin mövcud məlumat və vəziyyəti yerində bir daha yoxlamaq imkanı olacaq”, – deyə V.Bojadze bildirib.

Qeyd edək ki, Avropa Şurası Parlament Assambleyasının monitorinq missiyası bu gün siyasi partiyaların nümayəndələri ilə də görüş keçirəcək.

Səfərin məqsədi xüsusilə də oktyabr seçkilərindən sonra yaranmış siyasi böhran və Avropa İttifaqına üzvlük danışıqlarının dayandırılması fonunda Gürcüstanın Avropa Şurasının üzvü kimi üzərinə götürdüyü öhdəliklərin yerinə yetirməsini qiymətləndirməkdir.