Albaniyanın paytaxtı Tiranada güləş üzrə U23 Avropa çempionatı davam edir.

“İki sahil” xəbər verir ki, qitə birinciliyində ilk medalçılar müəyyənləşib. Azərbaycanın sərbəst güləşçiləri turnirə 2 gümüş və 2 bürünc medalla start verib.

Rəhman İmanov (57 kiloqram) təsəlliverici görüşdə Şimali Makedoniya təmsilçisi Stefan Şterjova tam üstünlüklə (11:0) qalib gəlib. Həmyerlimiz axşam seansında ukraynalı Vladislav Abramovu da üstələyərək (8:6) bürünc medala sahib çıxıb.

Murad Haqverdiyev (65 kiloqram) ukraynalı Mikita Qonçarovla gərgin mübarizə şəraitində keçən təsəlliverici görüşdən qalib ayrılıb – 5:4. Gəncə güləş məktəbinin yetirməsi həlledici qarşılaşmada moldovalı Fyodor Keavdari üzərində isə 9:6 hesablı qələbə qazanaraq, fəxri kürsünün 3-cü pilləsinə yüksəlib.

Kənan Heybətov (70 kiloqram) finalda rusiyalı Maqomed Eltemirovla qarşılaşıb. Finala qədər bütün rəqiblərinə tam üstünlüklə qalib gələn Kənan son qarşılaşmada istənilən güləşi nümayiş etdirə bilməyib – 0:11. Beləliklə, Heybətov ardıcıl 2-ci dəfə analoji yarışı gümüş medalla başa vurub.

Fərid Cabbarov (79 kiloqram) da finalda Rusiya təmsilçisi ilə üz-üzə gəlib. Arsen Balayana 1:5 hesabı ilə məğlub olan Fərid gümüş medalla kifayətlənib.