Süni zəkanın gələcəkdə hansı şəkildə istifadə olunacağı ilə bağlı qlobal çağırışlar müəyyən edilib.

“İki sahil” xəbər verir ki, bu barədə Beynəlxalq Telekomunikasiya Birliyinin Baş direktorunun müavini Tomas Lamanauskas XII Qlobal Bakı Forumunda danışıb.

O qeyd edib ki, qlobal iqtisadiyyatın mühüm hissəsini texnologiyalar təşkil edir: “Süni zəka sistemlərinin 45 faizi bu gün aktiv şəkildə istifadə edilir və son məhsullara böyük təsiri var. Ancaq hazırda dünyada məkanlar arasında rəqəmsal fərqlər var. Məsələn, Afrikada cəmi 20 faiz məlumatların emalı mərkəzi quraşdırılıb”.

T.Lamanauskas vurğulayıb ki, ötən il BMT sistemində 50-yə yaxın yeni mexanizmlər hazırlanıb: “Süni zəkanın gələcəkdə hansı şəkildə istifadə olunacağı ilə bağlı qlobal çağırışlar müəyyən edilib və mərkəzdə infrastruktur dayanır. Bütün dünyada qlobal mərkəzlər yaradılmalı, həmçinin süni zəka ilə bağlı qanunvericilik təkmilləşdirilməli, bacarıqlar da inkişaf etdirilməlidir. Çünki dünyanın yalnız 5 faizində süni zəka ilə bağlı bacarıqlı kadrlar yetişdirilib”.