Bu günlərdə 2016-cı ilin aprel ayında ölkəmizin ərazi bütövlüyü uğrunda gedən Aprel döyüşlərinin ildönümüdür. Bu dövr həm də xalqımızın yaddaşına qanlı bir tarix kimi həkk olunmuşdur. Aprel döyüşlərində, xüsusilə həm ordunun yüksək rütbəli zabitləri, həm də müxtəlif döyüş mövqelərində xidmət edən əsgərlər iştirak etmişlər.
Bu döyüşlərdə ordumuz tək düşmənin intensiv təxribatlarının qarşısını almadı, hərbçilərimizin igidliyi və Ali Baş Komandanın tapşırıqları və səriştəsi sayəsində Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi və Cocuq Mərcanlı, Goranboy rayonunun Gülüstan kəndi və Tərtər rayonunun Suqovuşan istiqamətində bir sıra mövqeləri düşməndən azad etdi. Azərbaycan Ordusunun şücaəti qarşısında düşmən öz planlarını reallaşdıra bilmədi. Düşmənin atəş nöqtələrinə və artilleriya qurğularına vurulan zərbələr, kəşfiyyat orqanları tərəfindən həyata keçirilən müvafiq tədbirlər nəticəsində Azərbaycan Ordusu xeyli irəlilədi. Azərbaycan bayrağı Lələtəpə yüksəkliyində qaldırıldı. Bu hadisə doğma Qarabağın işğaldan azad ediləcəyi günün uzaqda olmadığını göstərdi.
Bu qələbə ordumuzun döyüş qabiliyyətini və hərbi hazırlığını bir daha sübut etdi. Azərbaycan işğal dövründə daim ordunu, hərbi və müdafiə qabiliyyətini gücləndirirdi. Nəticə etibarilə, Aprel döyüşləri Ermənistanın işğalçılıq siyasətinin iflasa uğradığını göstərdi. Döyüşlərdən sonra Azərbaycan diplomatik cəbhədə də üstünlük əldə etdi və beynəlxalq ictimaiyyətin diqqətini Qarabağ münaqişəsinə bir daha yönəltdi.
Azərbaycan öz daxili gücünə, daxili siyasətinə və iqtisadi imkanlarına arxalanaraq 44 günlük Vətən müharibəsində də möhtəşəm Zəfər qazandı. Beynəlxalq hüquq ədalət prinsiplərinə əsaslanmadığı üçün işğala son qoya bilmədi. Azərbaycan bu reallığın ən bariz nümunələrindən biridir. 30 il ərzində beynəlxalq hüquq Azərbaycanın tərəfində olsa da, real addımlar atılmadı. BMT Təhlükəsizlik Şurasının 4 qətnaməsi kağız üzərində qaldı və işğalın qarşısını almaq üçün heç bir beynəlxalq mexanizm işləmədi. Azərbaycan yalnız öz daxili resurslarına güvənərək ərazi bütövlüyünü bərpa etdi və ədaləti təmin etdi.
Döyüşlərdə iştirak edən Azərbaycanın bir çox igid əsgər və zabiti mərdlik və şücaət nümayiş etdirərək düşmənə qan utdurmuş, düşmənin artileriya və canlı qüvvəsini məhv etmiş, torpaq-vətən uğrunda qanlarını və canlarını fəda edərək şəhid olmuşlar. Hər biri öz vətənini qorumaq uğrunda mübarizə aparan bu şəhidlər Azərbaycanın müstəqilliyinin və ərazi bütövlüyünün qorunmasında müstəsna rol oynamışlar.
Bütün ölkə ərazisində olduğu kimi Bakının Xətai rayonunda da aprel döyüşləri şəhidlərinin əziz xatirəsi hər zaman uca tutulur, onların ailələri daim diqqətdə saxlanılır. Aprel döyüşlərində təkcə Xətai rayonundan 10 nəfər igidimiz şəhid olmuşdur. Bu şəxslər Ağayev Rusif İbrahim oğlu, Baxışov Seymur Qulamhüseyn oğlu, Əzizzadə Xaliq Həsən oğlu, Həsənov Ziya Niyazi oğlu, Qurbanov Tural Gürşad oğlu, Məmmədov Rasim Əbdül oğlu, Musazadə Təbriz Tariyel oğlu, Niftalıyev Rəşad Şakir oğlu, Novruzov Mirzә Sərvər oğlu və Orucov Müşfiq Arif oğludur. Onları hər zaman anmaq və xatırlamaq bizim ümdə vəzifəmiz və vicdan borcumuzdur. Allah bütün şəhidlərimizə rəhmət eləsin!
Milli Məclisin deputatı
Pərvanə Vəliyeva
