Astara rayon Heydər Əliyev Mərkəzində Aprel döyüşlərinin 9 illiyinə həsr olunmuş konfrans keçirildi.

Tədbirə Aprel döyüşləri qəhrəmanı  Pəncəli  Teymurovun yaxın qohumları, Lənkəran-Astara Regional Gənclər və İdman idarəsinin Astara rayonu üzrə sektorunun,  Astara rayon Müharibə, Əmək və Silahlı Qüvvələr Veteranlar təşkilatının əməkdaşları, Ş. Qasımov adına şəhər 4 saylı, A. Hüseynov adına Suparibağ, S. Vurğun adına Təngərüd kənd tam orta məktəblərinin müəllim və şagirdləri qatılmışdı.

Tədbirdə əvvəlcə Ulu Öndər Heydər Əliyevin və Vətən naminə canından keçən  şəhidlərin əziz xatirəsi bir dəqiqəlik sükutla anıldı.

Dövlət Himninin sədaları  altında  başlayan tədbirdə Mərkəzin direktoru Kübra Səmədova öz çıxışında  dedi:- Azərbaycan müstəqilliyi, onun bərpası uğrunda qurbanlar verdiyi kimi, ərazi bütövlüyü, suverenliyi və müstəqilliyini qorumaq yolunda da mübarizə aparır, bu yolda da şəhidlər verir. Belə şərəfli günlərdən biri də Azərbaycan tarixinə Aprel döyüşləri, Aprel müharibəsi adı ilə düşüb. Dörd günlük müharibə 2016-cı il aprelin 1-dən 2-nə keçən gecə başlayıb. Bu, 1994-cü ildə Azərbaycanla Ermənistan arasında imzalanan atəşkəsdən sonra ilk ən şiddətli döyüş sayılır. Döyüşdə Azərbaycan əsgəri möhtəşəm  qələbə qazandı.

 Mərkəzin əməkdaşı  Elza Kazımovanın  məruzəsi də tədbir iştirakçıların tərəfindən maraqlı dinlənildi.

Tədbirdə “Aprel döyüşləri” qısa sənədli filmi nümayiş olundu və  rəssamlıq dərnəyi üzvlərinin əl işlərindən ibarət sərgiyə baxış keçirildi.

Zəfər Orucoğlu,
Azərbaycan Jurnalistlər Birliyinin üzvü