SOCAR-ın Bakı Ali Neft Məktəbində (BANM) Qara Dəniz Universitetləri Şəbəkəsinin (BSUN) üzvləri, Dünya İncəsənət və Elm Akademiyası və Qara Dəniz Dayanıqlı İnkişaf Həlləri Şəbəkəsinin tərəfdaşları ilə birgə universitetlərin sülh və təhlükəsizliyin təşviqindəki rolu mövzusunda beynəlxalq seminar keçirilib.
“İki sahil” xəbər verir ki, seminarda Azərbaycanı təmsil edən BSUN üzv universitetlərinin nümayəndələri iştirak ediblər.
BANM-ın rektoru Elmar Qasımov açılış nitqində universitetlərin sülh və təhlükəsizliyin təşviqindəki mühüm rolunu vurğulayıb. O, təhsil müəssisələrinin dünyada sabitlik və inkişafın təmin olunmasında oynadığı strateji rola diqqət çəkib və beynəlxalq əməkdaşlığın artırılmasının əhəmiyyətini qeyd edib.
BSUN-un Baş Katibi Prof. Eden Mamutun moderatorluğu ilə keçirilən panel müzakirələrində Qafqazdan Balkanlara qədər uzanan geniş Qara Dəniz regionunda insan təhlükəsizliyi problemləri ətrafında fikir mübadiləsi aparılıb.
Dünya İncəsənət və Elm Akademiyasının Prezidenti və Baş İcraçı Direktoru Dr. Garry Cakobs, 1996-2000-ci illərdə Rumıniyanın sabiq Prezidenti Emil Konstantınesku, İnterAction Şurasının Baş Direktoru Dr. Coanna Nös, Qlobal Təhlükəsizlik İnstitutunun Prezidenti və Dünya İncəsənət və Elm Akademiyasının Qəyyumu Conatan Granoff, Dünya Ətraf Mühit və Resurs İqtisadçıları Assosiasiyaları Şurasının Prezidenti və BMT-nin Dayanıqlı İnkişaf Həlləri Şəbəkəsi üzrə Qlobal İqlim Mərkəzinin sədri Prof. Dr. Fibe Koundouri, Saloniki Aristotel Universitetinin İdarə Heyətinin üzvü Prof. Dr. Qriqoris Zarotiadis, ‘BRIDGES Sustainability’ Elm Koalisiyasının Qurucu İcraçı Direktoru Stiven Hartmann, Dünya İncəsənət və Elm Akademiyasının Baş Katibi Canani Ramanathan və Cənubi Afrikalı naşir, müəllif və Dünya Universitetləri Konsorsiumunun əməkdaşı Qrant Şrayber spiker qismində iştirak ediblər.
Açıq formatda keçirilən panel müzakirələrində iştirakçılar regionda sülh və təhlükəsizliyin təşviqi üçün sistemli və multidisiplinar yanaşmaların tətbiqinin vacibliyi barədə fikirlərini bölüşüblər. Eyni zamanda, gələcəkdə universitetlərarası əməkdaşlığın əsas prioritet mövzuları üzrə razılığa gəliblər.
1998-ci ildə yaradılan BSUN Qara Dəniz regionunun universitetləri arasında əməkdaşlığı gücləndirən və Qara Dəniz İqtisadi Əməkdaşlığının sektoral dialoq tərəfdaşı olan bir platformadır. Eyni zamanda, Avropa Universitetlər Assosiasiyasının üzvü və BMT Akademik Təsir Təşəbbüsünün təsisçi üzvüdür, qlobal çağırışlara həll yolları tapmaq üçün gənclərin və tədqiqatçılarının potensialını istifadə edir.
