"ASAN xidmət" dövlət xidmətləri sahəsində müasir texnologiyaların, innovasiyaların tətbiqini həyata keçirən bir qurumdur. Süni intellekt həlləri vasitəsilə vətəndaş məmnunluğunun daim 100 faizə yaxın olmasını hədəfləyir və onun vasitəsilə həyata keçiririk.

Bu sözləri Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev jurnalistlərə müsahibəsində deyib. 

"ASAN xidmət"in fəaliyyətdə olduğu 12 il ərzində toplanan məlumatların cəmiyyət üçün açıq ola bilməsi də əsas hədəflərdən biri idi. Təqdimatı edilən publik data portalından cəmiyyətin müxtəlif təbəqələri öz şəxsi, biznes məqsədləri elmi araşdırmaları üçün istifadə edə, yeni məhsul və xidmətlər yarada biləcək. Portal bu gün istifadəyə verildi. "ASAN xidmət"in rəsmi internet səhifəsində həmin portala keçid var. Buna maraqlı olan hər kəsi istifadə etməyə dəvət edirik.

"ASAN xidmət"də bir neçə süni intellekt həlləri tətbiq edilir. Əsasən vətəndaş axınının idarə edilməsi, rəy sorğularının təhlili, data əsaslı qərar qəbul edilməsi üçün bir neçə süni intellekt həlləri tətbiq olunur və bu, davamlı olacaq", - deyə Ü.Mehdiyev bildirib. 

Ü.Mehdiyev, həmçinin diqqətə çatdırıb ki, 25 ölkə Azərbaycanın “ASAN xidmət” modelini öz ölkələrində tətbiq etmək üçün xidmətlə müqavilə imzalayıb. Artıq 10-dan çox ölkə bununla bağlı sorğu göndərib: "2025-2026-cı illərdə BMT dörd qitədə Azərbaycan ASAN modelinin təşviqi və təşkili ilə bağlı işlərə başlayıb".

Yaqut Ağaşahqızı, “İki sahil”