İspaniya və Portuqaliya elektrik şirkətləri İspaniya vaxtı ilə günortadan sonra baş verən böyük elektrik kəsilməsinin səbəbini araşdırır.

“İki sahil” “Euronews”a istinadla xəbər verir ki, materik İspaniya, Portuqaliya, həmçinin Fransa və Andorranın bəzi hissələrinə təsir edib.

Pireney adalarında milyonlarla insanın elektriksiz qaldığı bildirilir.

İspaniya hökuməti təcili iclas keçirir. Portuqaliya hakimiyyəti isə elektrik enerjisinin kəsilməsinə nəzarət etmək üçün işçi qrupu yaradıb. Qeyd olunur ki, problem “ölkədən kənarda” da yarana bilərdi.

Məlumata görə, Madriddə keçirilən “Madrid Open” tennis turniri bütün şəhərdə elektrik enerjisinin kəsilməsi səbəbindən dayandırılıb.

Avropanın ən böyük hava limanlarından biri olan Madridin “Barajas” hava limanında da elektrik yoxdur. Bir səyyah yazıb ki, gələn reyslərdə sərnişinlər oturub təyyarələrdə gözləməyə məcbur olurlar.

Bildirilib ki, hadisə nəticəsində sərnişin qatarlarının hərəkəti tamamilə dayandırılıb.

Xəbər verilir ki, elektrik enerjisinin kəsilməsi İspaniya və Portuqaliya sakinlərini təəccübləndirib, Lissabon və Madriddə, eləcə də digər şəhərlərdə işıqsız qalan yüzlərlə sərnişin metro tunellərində qalıb.

Mövcud məlumata görə, Kanar adaları, Seuta və Melillada elektrik enerjisi ilə bağlı problem yoxdur.

İspaniya mətbuatı yazır ki, Fransanın cənub-qərbində Perpignan və şərqi Narbonna arasında yüksək gərginlikli elektrik xəttini zədələyən yanğın elektrik enerjisinin kəsilməsinə mümkün səbəb ola bilər.

İspaniya Milli Kibertəhlükəsizlik İnstitutu (INCIBE) kiberhücum ehtimalını istisna etməyib. Avropa İttifaqı Şurasının prezidenti Antonio Kosta isə kiberhücum əlaməti olmadığını deyib.

Portuqaliyalı elektrik operatoru hesab edir ki, kəsintiyə temperaturun dəyişməsi ilə bağlı nadir atmosfer hadisəsi səbəb olub.

Məhərrəm Ağalaroğlu, “İki sahil”