Dünyanın müxtəlif ölkələrində toylarla bağlı maraqlı və fərqli adətlər mövcuddur. Şotlandiyanın bəzi bölgələrində isə gəlin və bəyə “zibil atmaq” adəti ilə qarşılaşmaq olar. İlk baxışda qəribə görünsə də, bu mərasim dərin simvolik məna daşıyır.

“Blackening” adlanan bu toy adəti zamanı gəlin və ya bəyin başına müxtəlif məhsullar – un, yumurta, qatıq, çürümüş meyvə və bəzən boya tökülür. Sonra isə onlar kənd və ya şəhər küçələrində dostları və ailə üzvləri tərəfindən gəzdirilir. Bəzən bu gəzinti avtomobillə də həyata keçirilir.

Bu qeyri-adi adətin arxasında maraqlı bir məna dayanır. “Blackening” mərasimi cütlüyün evlilik həyatına qədəm qoymadan əvvəl müxtəlif “çətinliklərə” dözməsini simvolizə edir. Əslində, bu zarafatlı və bir qədər narahat proses cütlüyün gələcəkdə qarşılaşa biləcəyi problemlərə hazır olduğunu göstərmək məqsədi daşıyır.

Eyni zamanda, bu adət cəmiyyət tərəfindən gələcək ailənin qəbul edilməsinin, dəstəyin və birgə əyləncənin göstəricisi sayılır.

“Blackening” ənənəsinin tarixi qədim Şotlandiya kənd mədəniyyətinə dayanır. Əvvəllər bu mərasim pis ruhları qovmaq və gələcək ailə həyatını uğursuzluqlardan qorumaq üçün həyata keçirilirdi. Zaman keçdikcə bu mərasim daha çox əyləncə və kollektiv zarafat formasını aldı.

Şotlandiyada tətbiq olunan bu qəribə, lakin mənalı toy adəti göstərir ki, dünyanın hər yerində ailə həyatı yalnız romantik duyğularla deyil, həm də birlik, dözüm və yumor hissi ilə başlayır. “Blackening” mərasimi isə bu dəyərləri unikal şəkildə ifadə edir.

Mələk Şixməmmədova,
BSU-nun tələbəsi,
Mənbə: National Records of Scotland