İtaliyada dünyanın ən böyük asma körpüsü tikiləcək. Mütəxəssislərin qiymətləndirmələrinə görə, körpü İtaliya iqtisadiyyatına illik 6,5 milyard avro zərər vuran Siciliya və Kalabriyanın təcrid olunması problemini həll edəcək.
“İki sahil” “Magzter” nəşrinə istinadla xəbər verir ki, İtaliya hökuməti Siciliyanı materiklə birləşdirəcək iddialı asma körpü layihəsini həyata keçirməyə hazır olduğunu bir daha bəyan edib.
13,5 milyard avro büdcəsi və 3,3 kilometr uzunluğunda olan bu körpü dünya rekordçusu ola bilər. Lakin 150 illik müzakirələrdən sonra layihə skeptiklərə çoxlu arqumentlər saxlayaraq, ölü nöqtədən hələ də tərpənməyib.
Əfsanəvi Messina boğazı ən mürəkkəb mühəndislik problemi olaraq qalır. Təkcə sürəti 100 km/saata çatan Pireney küləkləri və tektonik plitələrin qovşağında yüksək seysmik aktivlik nəyə desən dəyər. İnfrastruktur naziri Matteo Salvini əmin edir ki, yeni texnologiyalar bu risklərin öhdəsindən gəlməyə imkan verir və layihənin uğurla başa çatmasından sonra “nəqliyyat əlaqələrində inqilab”ı vəd edir.
Hökumət körpüdə geridə qalan cənub rayonları üçün xilas görür. Qiymətləndirmələrə görə, Siciliya və Kalabriyanın təcrid olunması onların iqtisadiyyatlarına illik 6,5 milyard avro itkiyə başa gəlir. Salvini 120 min iş yerinin yaradılmasından danışır, baxmayaraq ki, müstəqil ekspertlər ildə 2-3 min civarında daha sadə rəqəmlərə işarə edirlər. Tənqidçilər İtaliyada oxşar layihələrin hələ 1971-ci ildə ilk tikinti qanununun qəbulundan sonra baş verdiyi kimi, çox vaxt gecikdirildiyini və ya heç bir nəticə vermədiyini xatırladırlar.
Ekoloqlar unikal dəniz ekosistemi və quşların köç yolları üçün təhlükə olduğunu qeyd edirlər. “No Ponte” hərəkatının fəalları layihəni, xüsusən də İtaliyanın cənubunun əsas infrastruktur, səhiyyə və təhsillə bağlı xroniki problemləri fonunda, mənasız resurslar israfı adlandırırlar.
Meloni hökuməti Salvininin vəd etdiyi kimi, ayın sonuna qədər yekun qərarı təsdiqləsə, bu, Avropanın ən böyük tikinti layihələrindən biri olacaq.
Bununla belə, tarix ehtiyatlı olmağı öyrədir: layihənin həyata keçirilməsinə dair əvvəlki 12 cəhd, 2012-ci ilin borc böhranı zamanı olduğu kimi, təxirə salınma və ya tam imtina ilə başa çatdı.
