Özbəkistanda son dövrlərdə hüquqi və institusional islahatlar həyata keçirilmiş, dövlət idarəetməsi daha şəffaf və çevik sistemə keçmişdir. Yeni qəbul olunan Konstitusiya və qanunvericilik dəyişiklikləri vətəndaşların hüquq və azadlıqlarını daha geniş təmin edir, həmçinin demokratiyanın güclənməsinə xidmət edir. Siyasi sistemdə keçirilən islahatlar nəticəsində dövlət və cəmiyyət arasında qarşılıqlı etimad artmışdır.
Biz Özbəkistanın sürətli inkişafını, bütün sahələrdə genişmiqyaslı islahatların həyata keçirilməsini böyük maraq və sevinclə müşahidə edirik.Son illərdə Özbəkistan Respublikasında həyata keçirilən islahatlar, Prezident Şavkat Mirziyoyevin rəhbərliyi altında aparılan çevik və xalqyönümlü siyasət nəticəsində ölkə yeni inkişaf mərhələsinə qədəm qoyub. Azərbaycan olaraq biz də qardaş Özbəkistanda baş verən bu müsbət dəyişiklikləri böyük maraq və məmnuniyyətlə izləyirik, çünki bu proseslər təkcə regional deyil, həm də ümumtürk dünyası üçün əhəmiyyətlidir.
Özbəkistan iqtisadiyyatında aparılan liberallaşma, xarici sərmayələrin cəlb olunması, kiçik və orta sahibkarlığın inkişaf etdirilməsi bu ölkəni Mərkəzi Asiyanın iqtisadi mərkəzlərindən birinə çevirir. İnfrastruktur layihələri, sənaye parkları, nəqliyyat və logistika sahəsindəki uğurlar, kənd təsərrüfatında modern yanaşmalar və texnologiyaların tətbiqi ölkənin dayanıqlı inkişafına zəmin yaradır.
Xüsusilə Təşəbbüskar Özbəkistan modelinə keçid iqtisadiyyatda yeni impulslar yaradıb və yerli sahibkarlığın inkişafına şərait yaradıb. Özbəkistanın son illərdə ÜDM-nin artımı, xarici ticarətin genişlənməsi və yeni texnologiyaların tətbiqi beynəlxalq reytinq agentlikləri tərəfindən də yüksək qiymətləndirilir.Səhiyyə, təhsil və sosial təminat sahələrində aparılan islahatlar da Özbəkistanın yeni dövrünün mühüm hissəsidir. Xüsusilə gənclərin təhsil alması, peşə hazırlığı və cəmiyyətə aktiv inteqrasiyası, dövlətin əsas prioritetlərindən biri kimi dəyərləndirilir. Yüksək ixtisaslı kadrların hazırlanması və innovativ yanaşmaların tətbiqi ölkənin elmi və texnoloji potensialını gücləndirir.
Özbəkistan türk-islam mədəniyyətinin beşiyidir və bu zəngin irs bu gün də qorunur və dünyaya tanıdılır. Mədəniyyət və turizm sahələrindəki inkişaf, beynəlxalq sərgilər, forumlar və mədəniyyət tədbirləri vasitəsilə Özbəkistanın imici daha da möhkəmlənir.
Özbəkistanın beynəlxalq siyasətdə fəallığı, BMT, Türk Dövlətləri Təşkilatı və digər beynəlxalq strukturlarda təşəbbüslərlə çıxış etməsi onu qlobal səviyyədə mötəbər tərəfdaşa çevirib. Qonşularla mehriban münasibətlər və regional əməkdaşlığa töhfə verən mövqeyi, Özbəkistanın balanslı və uzaqgörən xarici siyasət apardığını sübut edir.
Azərbaycan və Özbəkistan arasında əlaqələr qardaşlıq, tarix, mədəniyyət və dil birliyinə əsaslanır. Prezident İlham Əliyev dəfələrlə bəyan edib ki, biz Özbəkistanın bütün sahələrdə əldə etdiyi uğurları böyük sevinclə izləyirik. Hər iki ölkə arasında strateji əməkdaşlıq dərinləşir, iqtisadi, mədəni və siyasi sahələrdə əlaqələr genişlənir. Şuşa Bəyannaməsi ilə Türk dünyasında güclənən həmrəylik fonunda, Özbəkistanın inkişafı bizim üçün də qürurverici və örnəkdir.
Özbəkistanın bugünkü inkişaf modeli təkcə regional deyil, həm də beynəlxalq səviyyədə nümunəvi bir yol xəritəsidir. Əldə olunan uğurlar islahatların davamlılığının, güclü liderliyin və xalqın bu proseslərə olan dəstəyinin nəticəsidir. Azərbaycan olaraq biz Özbəkistanın uğurlarını öz uğurumuz kimi dəyərləndirir, bu inkişaf yolunda qardaş ölkəyə daim dəstək göstərməyə hazır olduğumuzu bir daha bəyan edirik.
Y. Məmmədova,
YAP Xətai rayon təşkilatı
