Azərbaycan ordusu 30 il erməni quldurları tərəfində işğal olunmuş Qarabağımızı 44 günə azad edərək xalqımıza şanlı qələbə yaşatdı. Bu qələbədə canından keçən qəhrəman övladlarımız çox oldu. Sinəsini Vətənə sipər edib müharibə meydanda şəhadətə qovuşan belə qeyrətli oğullardan biri də 1977-ci ildə Lənkəran rayonunun Hirkan qələbəsində dünyaya göz açan şəhid mayor İqbal Bayramovdur. Lənkəran camaatı Vətən səmasının əbədi parlaq günəşinə çevrilən qəhrəman oğlunun adını həmişə qürurla çəkir, ona sonsuz sevgi, məhəbbət bəsləyir, xatirəsini əziz tuturlar. Hirkanlılar şəhid mayor İqbal Bayramovun 48 yaşını da böyük ehtiramla qeyd etdilər. Onun yatdığı müqəddəs torpağa baş çəkdilər, məzarına təzə güllərdən çələng hördülər. Həmçinin bildirdilər ki, İqbal Vətən, torpaq uğrunda canından keçib. O, cismən aramızda olmasa da , mənən ürəklərdə yaşayır.
Məlumat üçün deyək ki, İqbal Bayramov 1984-1994-cü illərdə doğma Hirkan qəsəbəsində A. Quliyev adına tam orta məktəbdə təhsil alıb. Yaxşı oxuyub, nizam-intizamı ona hörmət qazandırıb. 1994-1998-ci illərdə isə Azərbaycan Dövlət Neft Akademiyasında (ADNA) “Energetika” ixtisası üzrə oxuyub. 1998-2004-cü illərdə Azərbaycan Silahlı Qüvvələrinin Ağdam rayonunda yerləşən “N” saylı hərbi hissəsində xidmət edib. 2004-2005-ci illərdə Daxili İşlər Nazirliyinin Daxili Qoşunlarının Biləcəri qəsəbəsində yerləşən “N” saylı hərbi hissəsində baş leytenant hərbi rütbəsində Tağım Komandiri vəzifəsini layiqincə yerinə yetirib. 2005-ci ildə Daxili İşlər Nazirliyinin Daxili Qoşunlarının Qala qəsəbəsində yerləşən TTM-də təlim alıb. Eləcə 2005-2008-ci illərdə bir sıra xarici dövlətlərdə də təlimlərə qatılıb. Mayor rütbəsinə qədər yüksəlib. 2018-ci il yanvarın 14-də ehtiyata buraxılıb. Vətən müharibəsi başlayan gündən döyüşlərə girib . Füzulinin və Cəbrayılın azadlığı uğrunda gedən ağır müharibədə yağıya sarsıdıcı zərbələr vurub. Oktyabrın 5-də Cəbrayıl döyüşləri zamanı namərd gülləsi ondan yan keçməyib. Lənkəran şəhərində əbədi olaraq sevdalandığı Vətən torpağına baş qoyub.
Milyonların ürəyində yaşamaqla əbədilik qazanan zəfər şəhidi İqbal Bayramov ölümündən sonra “Vətən uğrunda”, “İgidliyə görə” və digər medallara layiq görülüb.
Zəfər Orucoğlu,
Azərbaycan Jurnalistlər Birliyinin üzvü
