Qulaqlıqların müntəzəm istifadəsi akustik travmaya, həmçinin neyrodegenerativ xəstəliklərin inkişafına səbəb ola bilər. Bu barədə “Rossiya 1” telekanalına rusiyalı nevroloq Anton Evdokimov məlumat verib.

Mütəxəssislərin fikrincə, qadcetlərdən daimi istifadə nəticəsində son vaxtlar eşitmə xəstəlikləri xeyli cavanlaşıb. Əvvəllər eşitmə itkisi əsasən 50 yaşdan sonra inkişaf etməyə başlayırdı, çünki bu yaşa bağlı bir prosesdir. İndi isə simptomlar 20 yaşınadək hər beş şəxsdən birində müşahidə olunur.

"Beynin müəyyən hissələri normal işləməyi dayandıracaq və bu, neyronların ölümünə, onların birləşdirici toxuma ilə əvəzlənməsinə səbəb olacaq və beləliklə, neyrodegenerativ xəstəlik inkişaf edəcək", - Evdokimov izah edib.

Çox vaxt yüksək səsli musiqi ilə qulaqcıqlardan istifadə edən yeniyetmələr audioloqların daimi xəstələrinə çevrilirlər.

"Akustik zədə baş verdikdə və eşitmə zəiflədikdə, birinci, ikinci, üçüncü gündə həkimə müraciət etmək çox vacibdir və audioloqa nə qədər tez müraciət etsəniz, eşitmə qabiliyyətinin geri qayıtma ehtimalı bir o qədər yüksəkdir", -deyə rusiyalı audioloq Nikata Dikapoltsev açıqlayıb.

“Müalicəni gecikdirsəniz, eşitmə itkisi xroniki bir xəstəliyə çevriləcək və eşitmə cihazı haqqında düşünməli olacaqsınız. Bunun qarşısını almaq üçün qadcetlərin imkanlarından istifadə edə bilərsiniz. Bu gün müasir smartfonların parametrlərində "qulaqlıq təhlükəsizliyi" bölməsi var, burada tələb olunan desibelləri seçə bilərsiniz”, - mütəxəssis qeyd edib.

Qulaqüstü qulaqlıqlar digərlərindən daha yumşaq hesab olunur. Ancaq hər halda, müəyyən edilmiş səs səviyyəsi həlledici əhəmiyyət kəsb edir. Əsas odur ki, onu 80%-dən yuxarı qaldırmayasınız.

Nubar Süleymanova, “İki sahil”