Almaniyada təqribən hər dörd işçidən biri hal-hazırda 55-65 yaş arasındadır. Yaşlı insanların nisbəti idarəetmədə xüsusilə yüksəkdir və burada onlar demək olar ki, əməkdaşların üçdəbirini təşkil edirlər.

“İki sahil” xəbər verir ki, Almaniya Federal Məşğulluq Agentliyinin məlumatına görə, ötən il yaşı 55-dən 65-ə qədər olan təxminən 7,8 milyon insan işlə təmin olunub və sosial təminata töhfə verib. Bu, indiyədək qeydə alınmış ən yüksək göstəricidir və ümumi məşğul əhalinin 23%-ni təşkil edir.

Son on ildə yaşlı işçilərin nisbəti demək olar ki, 17% artıb. Federal Məşğulluq Agentliyinin məlumatına görə, bunun əsas səbəbi hazırda bu yaş aralığına daxil olan bumer nəslidir.

Onların bir çoxunun yaxın on il ərzində təqaüdə çıxacağı gözlənilir. Bu insanların əmək bazarında payı əhəmiyyətli olaraq qalır.

Federal Məşğulluq Agentliyinin idarə heyətinin üzvü Daniel Terzenbaxın sözlərinə görə, uzunmüddətli rəqabət qabiliyyətinə can atan şirkətlər təcrübə və etibarlılıq baxımından xüsusilə yaşlı işçilərə güvənir. Bununla yanaşı, vurğulanır ki, yaşlı insanların xüsusilə işə qayıdanda ədalətli imkanlara, münasib təkliflərə ehtiyacları var.