SOCAR Azərbaycan üzrə ən böyük işəgötürənlərdən biri olaraq 15 ilə yaxındır ki, gənclərin əmək bazarına hazırlanması istiqamətində sistemli fəaliyyət göstərir. Bu çərçivədə tələbələr üçün ödənişsiz istehsalat təcrübəsi proqramları, həmçinin “Gənc istedadlar” proqramı həyata keçirilir.

“İki sahil” xəbər verir ki, bu barədə AZƏRTAC-a müsahibəsində “İKT Karyera Sərgisi”ndə iştirak edən SOCAR-ın İnsan resursları departamentinin və insan resursları zəncirinin mütəxəssisi Anar Həsənov deyib. O bildirib ki, gənclər SOCAR-ın rəsmi karyera, öyrənmə və inkişaf platforması vasitəsilə bütün elanlarla tanış ola bilərlər: “Gənclərin perspektivləri çox genişdir. Xüsusilə “Gənc istedadlar” proqramı son üç ilin məzunlarını və sonuncu kurs tələbələrini əhatə edir. Müəyyən ixtisaslar üzrə seçilən və proqramın sonunda uğur qazanmış gənclər SOCAR-da işə qəbul edilirlər”.

Anar Həsənov əlavə edib ki, proqram məzunlarının böyük hissəsi şirkətdə fəaliyyətini uğurla davam etdirir və yüksək karyera perspektivlərinə malikdir: “Gənclərimizə, xüsusilə uyğun ixtisas sahiblərinə SOCAR-ı seçməyi tövsiyə edirəm”.

Mütəxəssis gənclərin davamlı inkişafının SOCAR üçün prioritet olduğunu vurğulayıb.