Rumıniyalı analitik Yulian Kifu ABŞ Prezidenti Donald Tramp tərəfindən irəli sürülmüş Ukrayna üzrə “sülh planını” təhlil edərək onun həm hüquqi, həm siyasi, həm də strateji baxımdan tamamilə həyata keçirilməz olduğunu bildirir.

“İki sahil” xəbər verir ki, Yulian Kifunun sözlərinə görə, plan zahirdə diplomatik təşəbbüs kimi təqdim olunsa da, mahiyyətcə Ukraynanın suverenliyini məhdudlaşdırmağa, təzyiq altında güzəştlərə məcbur etməyə və Rusiyanı beynəlxalq arenada üstün mövqeyə çıxarmağa hesablanmış bir siyasi layihədir.

Y.Kifu qeyd edir ki, sənəddə Ukraynanın NATO-ya üzvlüyündən imtina etməsi, ölkənin müdafiə qabiliyyətinin məhdudlaşdırılması, işğal olunmuş ərazilərin statusunun qeyri-müəyyən şəkildə “dondurulması”, həmçinin Rusiya üçün əlverişli xüsusi idarəetmə modellərinin tətbiqi kimi məqamlar yer alır və bunların hamısı Ukraynanın təhlükəsizlik maraqlarına tam ziddir.

Analitikə görə, bu plan heç bir şəkildə real danışıqlar üçün baza hesab oluna bilməz, əksinə, Ukraynanı müdafiəsiz qoyan, regionda qeyri-sabitliyi artıran və beynəlxalq hüququn prinsiplərini pozan təkliflər toplusudur. Onun sözlərinə görə, belə bir plan münaqişəni həll etməyə deyil, daha çox siyasi təzyiq vasitəsi kimi istifadə olunmağa hesablanıb və Ukraynanın razılığı olmadan istənilən “sülh formulunun” legitimliyi yoxdur.

Y.Kifu vurğulayır ki, Ukrayna cəmiyyətinin əksəriyyəti ərazi güzəştlərinə qarşıdır. Onun fikrincə, təhlükəsizliyi təmin etməyən, Rusiya üçün diplomatik dividend yaradan və Ukraynanın gələcək müdafiəsini zəiflədən hər hansı sənəd müzakirəyə belə açıq ola bilməz. Analitik hesab edir ki, davamlı sülh yalnız Ukraynanın ərazi bütövlüyünün bərpası, suveren qərarvermə hüququnun qorunması və Qərbin təhlükəsizlik qarantiyalarının təmin edilməsi ilə mümkündür. Y.Kifun qənaətinə görə, Trampın planı bu meyarlara cavab vermədiyindən, həm beynəlxalq hüquq, həm regional sabitlik, həm də Ukraynanın milli maraqları baxımından tamamilə qeyri-real və qəbuledilməzdir.