Son günlər Gürcüstan ərazisində atmosfer havasında bərk toz hissəciklərinin konsentrasiyasının artmasına ölkə ərazisində səhra toz kütlələrinin yayılması səbəb olub.

“İki sahil” xəbər verir ki, bu barədə Gürcüstan Milli Ekologiya Agentliyinin Ətraf Mühitin Çirklənməsinin Monitorinqi Departamentinin rəhbəri Marina Arabidze məlumat verib.

Onun sözlərinə görə, Milli Ekologiya Agentliyi 18 avtomatik stansiya vasitəsilə atmosfer havasının keyfiyyətinə davamlı olaraq nəzarət edir.

“Son bir neçə gün ərzində Gürcüstanda atmosfer havasında hissəciklərin (PM10 və PM2.5) konsentrasiyasının yenidən artması müşahidə olunub ki, bu da cənub və cənub-şərqdən toz kütlələrinin yayılması ilə əlaqədardır. Bildiyiniz kimi, son vaxtlar nə yağış, nə qar şəklində yağıntı qeydə alınıb, nə də külək qeydə alınıb. Bu da Gürcüstanda toz kütlələrinin davamlı şəkildə yayılmasına səbəb olub. Vəziyyətin yaxşılaşması müvafiq meteoroloji proseslərin (yağış, qar, külək) inkişafından asılıdır”, - deyə M.Arabidze bildirib.

Milli Ekologiya Agentliyinin məlumatına görə, istənilən maraqlı şəxs www.air.gov.ge atmosfer havasının keyfiyyəti portalında havanın keyfiyyəti haqqında məlumat əldə edə bilər.

Qeyd edək ki, son günlər Gürcüstan ərazisində, eləcə də paytaxt Tbilisidə atmosfer havasında güclü çirklənmə müşahidə olunur. Bu, eyni zamanda, bir sıra resperator xəstəliklərin artması ilə müşahidə olunur.