Fransanın ultra sağçı Milli Birlik (Rassemblement National -RN) partiyası məhkəmənin qərarına uyğun olaraq, Avropa Parlamenti assistentlərinə dair işə görə təzminat ödəyib. Bu məbləği partiya və məhkəmə tərəfindən təqsirli bilinən şəxslər birlikdə ödəyiblər.

“İki sahil” xəbər verir ki, məhkəmə qərarına əsasən, RN, eləcə də şübhəli şəxslər, 2025-ci il 31 mart tarixli məhkəmə qərarının icrasını dərhal həyata keçirib. Bu qərara görə, təzminatların tam şəkildə ödənilməsi lazım idi. Hazırda böyük borcları olan RN, təzminatları ödəmək üçün iki mərhələli ödəniş həyata keçirib. İlk ödəniş iyul ayında, ikinci isə oktyabrda edilib.

Təzminatın bir hissəsi 200 000 avro Avropa Parlamentinin mənəvi ziyanını ödəmək üçün ayrılmışdır. Partiya, həmçinin 80 000 avro hüquqşünaslıq xərclərini də qarşılayıb.

Məhkəmə qərarında Marin Le Pen, 4 il həbs cəzasına məhkum edilib. O, 100 000 avro cərimə ödəməli olacaq. Həmçinin, 5 il müddətinə seçki hüququndan məhrum edilib. Bu qərara qarşı apellyasiya şikayəti verilib və Parisdə ikinci məhkəmə 13 yanvar - 12 fevral tarixləri arasında keçiriləcək. Bu prosesdə, RN və digər 12 şəxs də məhkəməyə cəlb ediləcək.