Səbəbi düşündüyünüzdən fərqlidir

Günlərinin çox hissəsini yatmaqla keçirən pişiklər yatdıqları yerləri təsadüfi seçmirlər. Bəziləri künclərdə və ya divan üzərində yatmağı seçsə də, bir çox pişiklər gecə saatlarında sahiblərinin yatağına gəlməyi üstün tuturlar. Bu davranış sahiblərdə maraq doğurur. Mütəxəssislər pişiklərin sahibləri ilə birlikdə yatmasının bir neçə mühüm səbəbi olduğunu bildirirlər.

Qoxu və təhlükəsizlik hissi əsas amildir

Pişiklər ətraf mühiti əsasən qoxu vasitəsilə tanıyırlar. Sahibinin qoxusu onlar üçün tanışlıq və aidiyyət hissi yaradır. Yataq isə insan qoxusunun ən çox toplandığı məkanlardan biri olduğu üçün pişiklər tərəfindən təhlükəsiz zona kimi qəbul edilir. Xarici qoxuların az olması və risk ehtimalının aşağı olması pişiklərin bu məkana yönəlməsində əsas rol oynayır. Eyni zamanda, yataq yer səviyyəsindən nisbətən hündür olduğu üçün pişiklərə ətrafı müşahidə etmək imkanı verir. Yatağın altındakı boşluq isə mümkün təhlükə zamanı qaçış sahəsi kimi qiymətləndirilir. Bu xüsusiyyətlər yatağı pişiklər üçün həm rahat, həm də strateji məkana çevirir.

Yaxınlıq və etibar göstəricisi

Müstəqil xarakterləri ilə tanınan pişiklər güclü emosional bağlar qura bilirlər. Yuxu zamanı canlılar özlərini daha müdafiəsiz hiss etdikləri üçün pişiyin sahibinə yaxın yatması qarşılıqlı etibarın göstəricisi sayılır. Sosial bağ formalaşdıran pişiklər yuxu zamanı fiziki təması da seçə bilirlər.

Davranış mütəxəssisləri bildirirlər ki, balalıq dövründə anası ilə birlikdə yatmış pişiklər yetkinlikdə də bu yaxınlığı sahiblərində axtara bilirlər. Yuxu zamanı təmas qurmaq istəyi bağın möhkəmləndiyini göstərən əlamətlərdən biridir.

İstilik və komfort amili

Pişiklərin isti yerlərə təbii cazibəsi var. Günəş düşən pəncərə kənarlarına, radiatorlara və hətta insan bədəninə yaxın olmaq onlar üçün ideal hesab olunur. İnsan bədəninin ətrafa yaydığı istilik pişiklər üçün cəlbedici olduğu kimi, yatağın yumşaqlığı da əlavə rahatlıq yaradır. Yorğan, yastıq və çarşaflar pişiklərin rahat mövqe tapmasına imkan verir.

Pişiklər “sevimli insanlarını” necə seçirlər?

Mütəxəssislərin fikrincə, pişiklər həddindən artıq diqqətdən çox, ardıcıl və sabit münasibətə üstünlük verirlər. Onlarla oynayan, yemək saatlarını gecikdirməyən, qum qabını təmiz saxlayan və onlarla gündəlik təmas quran şəxslər zamanla pişiklər üçün təhlükəsiz şəxsə çevrilirlər. Baxımı müntəzəm şəkildə həyata keçirən insan pişiyin yaddaşında müsbət assosiasiya yaradır. Baytar həkimlərin müşahidələrinə görə, pişiklər stresli anlarda da məhz bu şəxslərə yaxınlaşırlar.

Sərhədlərə hörmət edənlər üstün tutulur

Pişiklər fiziki təmas mövzusunda seçicidirlər. İstəmədikləri halda sığallanmaq və ya qucağa alınmaq onlarda narahatlıq yaradır. Sakit davranan, pişiyin bədən dilini düzgün oxuyan və sərhədlərinə hörmət edən insanlar daha etibarlı qəbul edilir.

Mütəxəssislər qeyd edirlər ki, erkən dövrdə qurulan münasibətlər də uzunmüddətli təsir göstərir. Balalıq çağında insanlarla fiziki təmasda olan pişiklər böyüdükcə seçimlərini daha aydın şəkildə nümayiş etdirirlər.

Mütəxəssislərin qənaətinə görə, pişiklərin sahibləri ilə birlikdə yatması təsadüfi deyil. Təhlükəsizlik, istilik, etibar və ardıcıl qayğı bu davranışın əsas səbəbləri arasında yer alır. Hər pişik fərqli xarakterə malik olsa da, özünü güvənli hiss etdiyi və ehtiyaclarının qarşılandığı insanlara yaxın olmağa meyillidir.

Şahnigar Əhmədova, “İki sahil”