Avropa Komissiyası “TikTok”u Avropa İttifaqının (Aİ) Rəqəmsal Xidmətlər Qanununu (DSA) pozduğunu aşkar edib.

“İki sahil” “Euronews”a istinadla xəbər verir ki, buna səbəb kimi “TikTok”un tətbiq istifadəçilərdə asılılığa səbəb ola biləcək xüsusiyyətləri kifayət qədər məhdudlaşdırmaması göstərilir.

Bildirilir ki, video platforma istifadəçilərə ekran hər dəfə yeniləndikdə davamlı olaraq yeni məzmun təqdim edən sonsuz sürüşdürmə kimi dizayn elementlərindən istifadə edir. Avropa Komissiyası hesab edir ki, bu cür xüsusiyyətlər tətbiqin məcburi istifadəsinə səbəb ola bilər.

Tənzimləyicilərin fikrincə, bu cür mexanizmlər istifadəçilərin beyinlərini "avtopilot" rejiminə keçirir və onları məzmunu daha tez-tez açmağa və sürüşdürməyə təşviq edir.

Bu cür xüsusiyyətlərin uşaqlara və yeniyetmələrə təsiri xüsusilə narahatlıq doğurur.

Avropa Komissiyası bildirib ki, “TikTok” istifadəçiləri xidmətin asılılıq yaradan xüsusiyyətləri ilə əlaqəli risklərdən qorumaq üçün kifayət qədər tədbirlər həyata keçirməyib.

“Sosial media asılılığı uşaqların və yeniyetmələrin inkişaf edən psixikasına zərərli təsir göstərə bilər”, — deyə cümə günü Avropa Komissiyasının texnoloji suverenlik, təhlükəsizlik və demokratiya üzrə icraçı vitse-prezidenti Henna Virkkunen bildirib.

O, Rəqəmsal Xidmətlər Qanununun platformaları istifadəçilərinə potensial təsirlərinə görə məsuliyyət daşıyacağını söyləyib: “Avropada uşaqlarımızın və vətəndaşlarımızın onlayn qorunmasını təmin etməyə sadiqik”.

Məhərrəm Ağalaroğlu, “İki sahil”