Avropa İttifaqı ölkələrinin Macarıstanın vetosu ilə bağlı Ukraynaya böyük kredit ayıra bilməməsi səbəbindən yaranan narazılıq artıq pik həddə çatıb.

“İki sahil” xəbər verir ki,  bu barədə diplomatik mənbələrə istinadla "Politico" məlumat yayıb.

Məlumata görə, Budapeştin mövqeyindən narazılıq o həddə çatıb ki, digər üzv dövlətlərin hökumətləri qapalı görüşlərdə Macarıstan rəhbərliyinə qarşı açıq şəkildə konfrontasiya mövqeyi tutmağa başlayıblar.

“Onun Ukrayna üçün planlaşdırılan 90 milyard avroluq Aİ kreditinə veto qoymaq hədəsi sammitin əsas həll olunmamış məsələsinə çevrilib”, — məqalə müəllifləri qeyd edirlər.

Anonim diplomatlar bildiriblər ki, Macarıstanın baş naziri Viktor Orbán maliyyə təşəbbüsünü dəstəkləyəcəyinə dair verdiyi vədi yerinə yetirməsə, bu, ona qarşı misli görünməmiş təzyiq üçün yol aça bilər.

Bununla yanaşı, mənbələr etiraf edirlər ki, rəsmi hüquqi proseslər məhkəmə instansiyalarında aylarla, hətta illərlə davam edə bilər. Müşahidəçilər qeyd edirlər ki, belə gecikmələr Ukrayna üçün kritikdir, çünki ölkəyə maliyyə dəstəyi artıq yaxın zamanda lazımdır.