ABŞ kəşfiyyat orqanları İsrailin Baş naziri Binyamin Netanyahunun Vaşinqton və Tehran arasında mümkün yekun razılaşmanı pozmağa yönəlmiş addımlar ata biləcəyindən narahatdır.

“İki sahil” xəbər verir ki, bu barədə “Washington Post” qəzeti ABŞ rəsmilərinə istinadla məlumat yayıb.

Məlumata görə, ABŞ administrasiyası Netanyahu hökumətinin Prezident Donald Trampın İranla uzunmüddətli razılaşma əldə etmək səylərinə mane ola biləcəyi barədə xəbərdar edilib. Kəşfiyyat qiymətləndirmələrində İsrail rəhbərliyinin Livanda “Hizbullah”a qarşı əməliyyatları davam etdirmək niyyətində olduğu bildirilir. Halbuki Livanda hərbi fəaliyyətin dayandırılması ABŞ-İran razılaşmasının əsas şərtlərindən biri hesab olunur.

Nəşrin məlumatına görə, İsrail hakimiyyəti Vaşinqton və Tehran arasında müzakirə olunan memorandumun şərtlərindən narazıdır və onu İrana qarşı kifayət qədər sərt hesab etmir. ABŞ rəsmiləri hesab edirlər ki, İsrailin cənubi Livandan qoşunlarını çıxarmaqdan imtina etməsi belə mümkün razılaşmanı risk altına qoya bilər.

Bundan əvvəl CNN telekanalı Netanyahu hökumətinin gələcək ABŞ-İran razılaşmasının şərtlərinə təsir göstərmək üçün İsrail tərəfdarı media və siyasətçilərin dəstəyindən istifadə etməyi planlaşdırdığını bildirmişdi.

Netanyahu iyunun 19-da İsrail ordusunun Livanın cənubundakı təhlükəsizlik zonasındakı mövqelərini lazım olduğu müddətdə qoruyacağını bəyan edib. ABŞ Prezidenti Donald Tramp isə regionda, o cümlədən Livanda atəşkəsin vacibliyini vurğulayıb.