Braziliya sakinlərinə yadplanetlilərin hücumu barədə saxta mesajlar göndərilib. Xakerlər dövlətin fövqəladə xəbərdarlıq sistemini sındıraraq smartfonlara yüksək səs siqnalı və digər tətbiqlərin üzərini örtən açılan (pop-up) pəncərələrlə bildirişlər göndəriblər. Mesajların göndərilməsi iyunun 19-dan 20-nə keçən gecə saat 23:41-dən 01:23-ə qədər davam edib — ümumilikdə 10 fərqli bildiriş göndərilib ki, onlardan doqquzu "Cell Broadcast" (qısa mesaj xidmətinin ötürülməsi) sistemi, biri isə SMS vasitəsilə ötürülüb.

“İki sahil” xəbər verir ki, bu barədə Rusiya mediası məlumat yayıb.

Mesajlarda yadplanetlilərin hücumundan "müdafiə olunmaq" çağırışları yer alıb, həmçinin "mizantropiya" sözü qeyd olunub. Bu bildirişləri ən azı səkkiz regionun - Belu-Orizonti, Braziliya, Kampu-Grandi, Kuritiba, Riu-Branku, Rio-de-Janeyro, Salvador və San-Paulu şəhərlərinin, eləcə də bir sıra kiçik yaşayış məntəqələrinin sakinləri alıblar. Ümumilikdə saxta xəbərdarlıq təxminən 30 milyon insana çatıb.

İstintaq hələlik kibercinayətkarın tək və ya qrup halında hərəkət etdiyini müəyyənləşdirir. İlkin məlumatlara görə, sistemin sındırılması birbaşa Milli Mülki Müdafiə təşkilatının platformasında baş verib. Faktla bağlı Braziliya Federal Polisi və Milli Telekommunikasiya Agentliyi tərəfindən araşdırma aparılır.