Bakıda keçirilən İslam Əməkdaşlıq Təşkilatının (İƏT) üzvü olan dövlətlərin Parlament İttifaqı Konfransının 20-ci sessiyası çərçivəsində Milli Məclisin sədri Sahibə Qafarova Türkiyə Böyük Millət Məclisinin (TBMM) sədri Numan Kurtulmuş ilə görüşüb.

“İki sahil” xəbər verir ki, bu barədə Milli Məclisin Mətbuat və ictimaiyyətlə əlaqələr şöbəsi məlumat yayıb.

Qardaşlıq və Müttəfiqlik Münasibətlərinin Zirvəsi

Görüşdə Azərbaycan ilə Türkiyə arasındakı qardaşlıq və müttəfiqlik münasibətlərinin bütün istiqamətlərdə yüksək səviyyədə inkişaf etməsindən məmnunluq ifadə olunub.

Ulu Öndər Heydər Əliyevin "Bir millət, iki dövlət" şüarını rəhbər tutan hər iki ölkənin bütün məsələlərdə tam həmrəylik və qarşılıqlı dəstək nümayiş etdirdiyi xüsusi vurğulanıb.

Spiker Sahibə Qafarova bildirib ki, Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan arasındakı qarşılıqlı hörmət və etimada əsaslanan qardaşlıq münasibətləri, həmçinin onların güclü siyasi iradəsi və qətiyyəti sayəsində ölkələrimiz arasındakı əlaqələr özünün ən yüksək səviyyəsinə çatıb.

Parlamentlərarası Əməkdaşlığın İnkişafı

Görüş zamanı ikitərəfli münasibətlərin daha da genişlənməsində parlamentlərin oynadığı vacib rol önə çəkilib və bu istiqamətdə mövcud olan əlaqələrin səviyyəsi yüksək qiymətləndirilib.

Parlament sədrlərinin qarşılıqlı səfərlərinin, mütəmadi görüşlərin və deputatlar arasındakı sıx təmasların bu əlaqələrə mühüm töhfələr verdiyi diqqətə çatdırılıb.

Qanunverici orqanlar arasında əməkdaşlığın əsas istiqamətləri barədə bunlar qeyd olunub:
* Qanunverici orqanlarımız parlament komitələri, dostluq guprupları və parlament aparatları səviyyəsində səmərəli əməkdaşlıq həyata keçirirlər.
* ⁠Parlamentlər həm ikitərəfli, həm də üçtərəfli formatlarda uğurlu tərəfdaşlıq edirlər.
* ⁠Beynəlxalq parlament təşkilatları çərçivəsində hər iki ölkə birgə fəaliyyət göstərir və qarşılıqlı dəstək nümayiş etdirir.

Bakı Sessiyasının Əhəmiyyəti və Dövlət Başçısı ilə Görüş

Söhbət zamanı TBMM sədri Numan Kurtulmuş Prezident İlham Əliyev ilə keçirdiyi görüşü məmnunluqla xatırladaraq, həmin görüşlə bağlı çox müsbət təəssüratlarını bölüşüb.

Numan Kurtulmuş İslam Əməkdaşlıq Təşkilatının üzvü olan dövlətlərin Parlament İttifaqı Konfransının 20-ci sessiyasının Bakıda yüksək səviyyədə təşkil olunmasına görə minnətdarlığını ifadə edib.

O, bu mühüm tədbirin İƏT çərçivəsində tərəfdaşlığın genişləndirilməsi və üzv ölkələrin parlamentləri arasında münasibətlərin daha da dərinləşdirilməsi baxımından böyük əhəmiyyət daşıdığını vurğulayıb.

Görüşün sonunda tərəflər arasında qarşılıqlı maraq doğuran digər məsələlər ətrafında da geniş fikir mübadiləsi aparılıb.