Fars körfəzindəki genişmiqyaslı neft sızması sürətlə son illərdə dünyada baş vermiş ən ciddi insidentlərdən birinə çevrilir.

“İki sahil” xəbər verir ki, beynəlxalq agentliklərin, peyk görüntülərinin və ekoloji qrupların məlumatlarına görə, neft sızması bir neçə həftə ərzində demək olar nəzarətsiz şəkildə yayılıb.

“Reuters” agentliyi yazır ki, BMT-nin gəmiçilik məsələləri üzrə agentliyinin məlumatına görə, çərşənbə günü Rusiyaya məxsus neft daşıyan “Kerolayn Bezengi” tankerinin qəzaya uğraması nəticəsində Oman sahillərində yaranan neft ləkəsi ölkənin materik hissəsinə çatıb.

Agentliyin əldə etdiyi peyk görüntülərini araşdıran neft sızmaları üzrə mütəxəssis Con Amosun sözlərinə görə, neft ləkəsi hazırda 2 min kvadratkilometrdən çox ərazini əhatə edir.

Rusiyaya məxsus təxminən 800 min barel nefti daşıyan və beynəlxalq sanksiyalara məruz qalan “Kerolayn Bezengi” tankeri iyunun 30-da Oman adası yaxınlığında saya oturub. Gəmi iyunun 8-də Yəmən sahillərində çətinliklərlə üzləşdiyini ilk dəfə bildirib. Mənbələrin məlumatına görə, “Kerolayn Bezengi” tankerində partlayış baş verib.

Tankerlərdən neft sızması ilə bağlı kompensasiya məsələləri ilə məşğul olan hökumətlərarası “IOPC Funds” agentliyi “Reuters”ə bildirib ki, təmizləmə işlərinin xərclərini ödəməyəcək. Buna səbəb insidentin adi qəza deyil, “müharibə aktı” kimi qiymətləndirilməsidir.

Amosun sözlərinə görə, belə olan halda tanker küləyin və dalğaların davamlı təsiri altında dağılmaqda davam edəcək, bütün yükünü itirəcək və bu, 40-50 milyon qallon neftin yayılmasına səbəb ola bilər.