Müasir dövrdə cəmiyyətin qarşısında duran mühüm sosial problemlərdən biri narkotik vasitələrin qanunsuz dövriyyəsi və narkomanlığın yayılmasıdır. Bu problem yalnız ayrı-ayrı insanların sağlamlığına və həyatına təhlükə yaratmır, eyni zamanda ailə münasibətlərinə, sosial mühitə və bütövlükdə cəmiyyətin təhlükəsizliyinə mənfi təsir göstərir.

Narkotik vasitələrə aludəçilik əksər hallarda insan həyatında kiçik görünən bir addımdan başlayır. Maraqlanmaq, ətrafdakıların təsirinə düşmək, “bir dəfə sınamaqla heç nə olmaz” düşüncəsi sonradan ağır nəticələrə gətirib çıxara bilər. Zaman keçdikcə insanın iradəsi zəifləyir, sağlamlığı və sosial münasibətləri pozulur, təhsil və əmək fəaliyyətinə marağı azalır. Beləliklə, əvvəlcə təsadüfi görünən seçim insanın həyatını dəyişən ciddi problemə çevrilə bilər. Xüsusilə gənclərin narkotik vasitələrdən qorunması xüsusi əhəmiyyət daşıyır. Gənclik insan həyatının gələcək istiqamətinin formalaşdığı mühüm mərhələdir. Bu dövrdə düzgün sosial mühitin, sağlam dostluq münasibətlərinin, ailə nəzarətinin və maarifləndirmənin əhəmiyyəti böyükdür. Narkotik vasitələrin yaratdığı təhlükələr barədə gənclərin məlumatlandırılması, onların asudə vaxtının səmərəli təşkil edilməsi və idmana, təhsilə, yaradıcılığa yönləndirilməsi profilaktik mübarizənin mühüm istiqamətlərindəndir.

Narkotik vasitələrlə bağlı təhlükə yalnız onların istifadəsi ilə məhdudlaşmır. Bu vasitələrin qanunsuz əldə edilməsi, saxlanılması, daşınması, satılması və digər qanunsuz dövriyyə formaları qanunvericiliklə müəyyən edilmiş məsuliyyətə səbəb olur. Narkotik vasitələrin qanunsuz dövriyyəsi ilə məşğul olan şəxslər barəsində qanunvericiliyin tələblərinə uyğun olaraq zəruri hüquqi tədbirlər görülür. Lakin narkotik vasitələrə qarşı mübarizənin effektivliyi yalnız hüquqi məsuliyyət tədbirlərinin tətbiqindən asılı deyil. Bu istiqamətdə əsas məqsədlərdən biri cinayət və digər hüquq pozuntularının qarşısının alınmasıdır. Bunun üçün cəmiyyətin bütün təbəqələrinin, xüsusilə ailələrin, təhsil müəssisələrinin, aidiyyəti dövlət qurumlarının və ictimaiyyətin birgə səyləri vacibdir. Ailə narkotik asılılığının qarşısının alınmasında mühüm rol oynayır. Valideynlərin övladları ilə açıq və sağlam ünsiyyət qurması, onların davranışındakı dəyişikliklərə diqqət yetirməsi və yaranan problemlərə vaxtında müdaxilə etməsi bu məsələdə mühüm əhəmiyyət kəsb edir. Gəncin hər hansı çətinliklə üzləşməsi halında onu qınamaq və cəmiyyətdən uzaqlaşdırmaq əvəzinə, problemin həlli üçün dəstək göstərilməsi daha düzgün yanaşmadır.

Digər mühüm məsələ narkotik asılılığından əziyyət çəkən şəxslərə münasibətdir. Profilaktika və maarifləndirmə ilə yanaşı, belə şəxslərin müvafiq tibbi və sosial yardıma yönləndirilməsi də vacibdir. Çünki narkotik asılılığı ilə mübarizə yalnız hüquqi deyil, həm də sosial və sağlamlıq məsələsidir.

Narkotik vasitələrin qanunsuz dövriyyəsinin qarşısının alınması istiqamətində hüquq-mühafizə orqanlarının fəaliyyəti ilə yanaşı, vətəndaşların hüquqi maarifləndirilməsi də mühüm əhəmiyyət kəsb edir. Hər bir şəxs narkotik vasitələrin qanunsuz dövriyyəsinin cəmiyyət üçün yaratdığı təhlükəni dərk etməli, bu sahədə qanunvericiliyin tələblərinə əməl etməlidir.

Sağlam cəmiyyət sağlam fərdlərdən formalaşır. Narkotik vasitələrə qarşı mübarizə yalnız dövlət qurumlarının deyil, hər birimizin məsuliyyətidir. Bu mübarizədə ən güclü vasitələrdən biri maarifləndirmə, digər mühüm istiqamət isə sağlam həyat tərzinin təbliğidir. Gənclərimizi narkotik vasitələrin yaratdığı təhlükədən qorumaq, onları sağlam düşüncəyə, təhsilə, idmana və faydalı fəaliyyətə istiqamətləndirmək gələcəyə qoyulan ən mühüm sərmayələrdən biridir. Narkotik vasitələrə qarşı mübarizənin məqsədi yalnız qanunsuz əməllərin qarşısını almaq deyil, həm də insanların sağlam və təhlükəsiz gələcəyini təmin etməkdir. Sağlam cəmiyyət naminə bu mübarizə davamlı olmalı, hər bir insan öz məsuliyyətini dərk etməli və narkotik vasitələrin yaratdığı təhlükəyə qarşı laqeyd qalmamalıdır. Çünki narkotikdən uzaq hər bir həyat, əslində, sağlam gələcəyə atılmış bir addımdır.

Xaçmaz rayon prokurorluğu