09 sentyabr 2019 11:18
167

Çap mediası: Dünənin, bu günün, gələcəyin salnaməsi

Bir əsr  yarıma yaxın tarixə malik milli mətbuatımız Zərdabi irsinin layiqli davamçısıdır. Bu irsi internet, ya da onlayn media məhz bu cür davam etdirə bilərmi? Əsla! Doğrudur, elektron media print medianı üstələyib, lakin tamamilə sıradan çıxara bilməz. Çap mətbuatı jurnalistikanın klassik ənənələrini və prinsiplərini yaşadır, qoruyub saxlayaraq gələcəyə ötürür.

Azərbaycan Mətbuat Şurasının sədri, Milli Məclisin deputatı Əflatun Amaşov mətbuata müsahibəsi zamanı belə bir fikir bildirib ki, dünyanın heç bir ölkəsində yazılı mediadan imtina ənənəsi yoxdur: “Doğrudur, print medianın mövqeyi zəifləyib. Bu, informasiya texnologiyalarının inkişafı ilə əlaqədardır. Ancaq hər bir halda qəzetlər saxlanılır. Onlar günümüzün salnaməsini yaradırlar. Bilmək olmaz ki, əlli və ya yüz il sonra internet olacaq, ya yox. Ancaq mətbu nəşrlər əsrlərdir ki, müxtəlif dövrlərlə bağlı informasiya mənbələri, tədqiqat materialları funksiyasını yerinə yetirirlər. Etibar qazanıblar. Onların üstündən xətt çəkilə bilməz. Azərbaycanda da mətbu nəşrlər saxlanılmalıdır. Dövlətin siyasətini yayan mətbuat orqanları da həmçinin.”

Bakı Dövlət Universitetinin  Jurnalistikanın nəzəriyyəsi və təcrübəsi kafedrasının müdiri, filologiya  elmləri doktoru, professor Cahangir  Məmmədli mövzu ilə bağlı  açıqlamasında bildirdi ki,  ictimaiyyətin nəzarətində nə qədər çox informasiya resursu olarsa, bir o qədər yaxşıdır. Çünki informasiya almaq üçün cəmiyyət ən çox peşəkar kütləvi informasiya vasitələrinə ümid bəsləyir. Çap mətbuatı gündəlik informasiya axınını “ələkdən keçirib”, ictimai maraq kəsb edən xəbərləri seçir və məsuliyyətlə xalqa  çatdırır. Qəzetlər sırasında Azərbaycan dövlətçiliyini daim dəstəkləyən, azərbaycançılıq ideyalarını bütün dünyaya yayan, cəmiyyətə ciddi  səmərə verən, oxucularda  xüsusi ictimai rəy formalaşmasına xidmət edən  mətbu nəşrlər var. Bu cür qəzetlərin fəaliyyətinin dayandırılması bir oxucu  kimi mənim üçün  əsl faciə ola bilər.”

Cahangir  Məmmədli, həmçinin əlavə etdi ki, çap mediası dəqiq, qərəzsiz, obyektiv və balanslı formada işləyən medianın peşəkar və qədim növüdür. Fikrimcə, ənənəvi medianın süqutu haqqında düşünmək çox  böyük səhv olardı. Unutmayaq ki,  1875-ci ildə də Həsən bəy Zərdabi milli mətbuatımızın əsasını məhz “Əkinçi” qəzeti ilə  qoyub. Kütləvi informasiya vasitələrinin ən əsas növü olan çap mediasının mövcudluğu bütün dövrlər üçün zəruridir. İnformasiya  mübadiləsi üçün qəzetlərin mövcudluğunu çox labüd hesab edirəm. Hər hansı bir dövr üçün ənənəvi medianın  tamamilə sıradan çıxma ehtimalı haqqında belə düşünmək istəmirəm. Çap mediasından daha təkmil, mükəmməl, operativ, oxunaqlı olmaq kimi keyfiyyətlər tələb olunur. Bunun üçün də çap mediasını məhz  yeni və modern mərhələdə yaşatmaq üçün müasir forma, üslub düşünülməlidir.

Yaqut Ağaşahqızı,

“İki sahil”