Müsahibimiz Bakı Slavyan Universitetinin tələbəsi Rahim Mirzəcandır

-Rahim, ilk  olaraq özün  haqqında  məlumat ver.

-20 yaşım  var. 2017-ci ildə Yardımlı rayon  Anzov  kənd tam  orta məktəbini bitirmişəm. Həmin  ildə  də Bakı Slavyan  Universitetinin (BSU) Azərbaycan  filologiyası və jurnalistikası fakültəsinə qəbul olunmuşam. Elə ali təhsil almağa başladığım ilk  illərdən bir  sıra  mətbuat  orqanları ilə əməkdaşlıq etdim.  Bir neçə internet televiziyalarında  aparıcı-müxbir kimi  ilkin fəaliyyətim  oldu.  Universitet daxilində təşkil olunan  tədbirlərdə iştirak  edib, oradan  xəbərlər hazırlayıb saytlara  göndərirdim. İctimai  fəallığıma  görə bir çox təşəkkürnamələr, sertifikatlarla təltif olunmuşam.

-Niyə ixtisas seçimin məhz jurnalistika  oldu?

-Bu  sənətə sevgim məhz  onun  adına olan  vurğunluğumdan  başlayır. Valideynlərim, ən çox da atam Azərbaycan dili və ədəbiyyatı müəllimi olmağımı istəyirdi.  Təbii ki, bütün işlərdə valideynlərin də razılığı olmalıdır. Ancaq ixtisas  seçimi istisnadır. Çünki bu peşəni sən özün davam etdirəcəksən. Axı sevmədiyin bir işin arxasınca qaçıb yorulmaq, ən əsası ömrünün ən şirin vaxtlarını boşu-boşuna itirməkdir. Mənə elə gəlir ki, düzgün qərar verdim.

-Modern  dövrdə sosial medianın  aktual və tələbatlı olmasına  münasibətin necədir?

- İndi sosial media dedikdə internet, internet dedikdə gənclik yada düşür. Həm gənc olmağımız, həm də texnoloji vasitələrin inkişaf etdiyi indiki dönəmdə yaşamağımız, üstünlük yaradır, əlaqələrimiz daha geniş olur.  Əsasən “Facebook”da aktiv oluram. Dostluğumda peşəkar jurnalistlər çoxluq təşkil edir. Onların fəaliyyətlərini izləyirəm. İxtisaslaşmağım üçün bunu çox önəmli sayıram. Bir də hobbi kimi məşğul olduğum müğənnilik fəaliyyətimdən paylaşımlar edərək, öz auditoriyamı genişləndirmək istəyirəm.

- Hansı musiqi janrı sənin  iç dünyana daha yaxındır?

-Musiqi dünyam deyərdim ki, indiki gəncliyin musiqi dünyasından çox fərqlidir. Həmyaşıdlarımın səs-küylü musiqilər, estrada  mahnıları dinlədikləri  halda, mən isə xalq musiqilərinə, ən çox da muğamlara qulaq asıram. Qədir Rüstəmov, Teymur Mustafayev, Əlibaba Məmmədov, Alim Qasımov və onun tələbələri, bir qədər müasirlərdən Mirələm Mirələmov, Elnarə Abdullayeva, Zakir Əliyev kimi sənətkarları dinləyərək  bəhrələnirəm, musiqi  zövqümü  inkişaf etdirirəm. Bəlkə də, Azərbaycan muğamına bu qədər bağlı olmağım uşaqlıqdan bəri könlümdə tüğyan edən xanəndə olmaq sevgisi ilə bağlıdır.

-Asudə vaxtlarını necə dəyərləndirirsən?

-Əsasən evdə beynimdə verilişlərin ssenarisini cızıram, aparıcılıq edib,  gələcəyin aparıcısı kimi özümü efirə hazırlayıram. Bir də ən çox özümü səhnələrdə, çoxsaylı auditoriya qarşısında düşünüb mahnılar, muğamlar ifa edirəm. Bu da mənə səhnədə sanki ilk dəfə deyilmiş kimi hiss etməyimə kömək edir. Daha uğurlu olaram. Ara-sıra şeirlər, problem xarakterli yazılar yazıram.  Parodiya etmək qabiliyyətim var. Məktəb vaxtından bayram tədbirlərində şagird dostlarımızla birlikdə maraqlı parodiyalar edirdik. Dostlarımın  üzündə təbəssüm  yaratmaq məni  də sevindirir. Bundan  başqa,  sosial media  hesablarımda təhsil haqqında yeni  xəbərlər paylaşıram. Beləliklə də, ən  son  yeniliklərdən abituriyentlərin, vaildeynlərin, müəllimlərin məlumatı olur.

-Rahim, Vətən sənin üçün  hansı anlamı ifadə edir?

- Vətən xüsusi sevgi və hörmətə layiq müqəddəs torpaqdır. İnsan mənəviyyatını müəyyən edən, zənginləşdirən önəmli əxlaqi prinsiplərdən biri də xalq və Vətən sevgisidir. Onun dağı, daşı, torpağı, suyu, səması bizim üçün əzizdir, doğmadır. Vətən  kəlməsi  nə qədər də mənalı və dərindir. Deyilişi şirin olduğu kimi, məzmunu, qayəsi də yüksək və hikmətlidir. Tariximizə nəzər salsaq görərik ki, elimizin, obamızın ən gözəl ənənələrindən biri də torpağa, ana yurda, vətənə bağlılıq, xalqımızı zaman-zaman yadelli işğalçılardan  qorumaq, vətən üçün candan keçmək olmuşdur. Elə buna görə də xalqımızın vətən uğrunda, torpaq uğrunda canından, qanından keçən saysız-hesabsız, unudulmaz qəhrəmanları olmuşdur. Azərbaycan torpağı müqəddəs torpaqdır.  Bu torpağa qanı tökülən igidlərin yazdıqları tarix və etdikləri igidliklər Azərbaycanın müqəddəs torpağını daha da ulu etmişdir.  Şəhidlər üçün yazılan hekayətlər həm də gələcək nəsillər üçün ibrət dərsidir.  Vətən yolunda şəhid olmaq vətəndaşlığın ən ali zirvəsidir. Bütün zirvələrdən yüksəkdə duran ilahi bir  zirvə, həm də o, adi gözlə yox, yalnız mənəvi gözlə görülə biləcək bir  zirvədir. Bu günün gənci sabahın atası, anası, ailə başçısıdır. Onun öz övladını necə tərbiyə etməsi isə ilk növbədə bu gün onun özünün necə yetişdirilməsindən asılıdır.

-Qarşıdan  Azərbaycan  tarixinin şanlı səhifəsi  15 iyun - Milli  Qurtuluş Günü  gəlir. Bu tarixi gün haqqında   fikirlərini eşitmək istərdik...

-Tariximizə Milli Qurtuluş Günü kimi daxil olmuş 15 iyun sadəcə təqvim bayramı deyil, həm də siyasi və tarixi əhəmiyyətə malik gündür. 1993-cü il iyunun 15-i Azərbaycan tarixinə Milli Qurtuluş Günü kimi daxil olub və dövlətçiliyimiz yox olmaq təhlükəsindən xilas edilib. Azərbaycan xalqının ümummilli lideri Heydər Əliyev respublikada tüğyan edən ictimai-siyasi böhranı aradan qaldırdı və inkişafın təməlini qoydu. Bu gün milli qurtuluş ideologiyasının təntənəsi müstəqil respublikamızın davamlı inkişafında özünü büruzə verir, dünyada Azərbaycanın nüfuzu artır.  Ümummilli lider Heydər Əliyevin dahi  şəxsiyyət kimi yürütdüyü siyasətin başlıca qayəsi Azərbaycanı hər bir vətəndaşının təhlükəsizliyini qoruya biləcək qədər qüdrətli dövlətə çevirmək olmuşdur. Bu gün Azərbaycan  Respublikasının Prezidenti İlham Əliyev Ümummilli Liderimizin siyasi xəttinə sadiq qalaraq müstəqil ölkəmizi inamla gələcəyə doğru aparır.

- Dövlətimizin Azərbaycan gəncləri üçün yaratdığı imkanlar haqqında nə deyə bilərsən?

-Ölkəmizdə gənclərlə iş sahəsində görülən tədbirlər Azərbaycan gəncliyinin inkişafına təkan vermiş, onların cəmiyyətdə özlərini təsdiq etməsində böyük rol oynamışdır. Bu gün gənc nəslin vətənpərvərlik ruhunda yetişdirilməsi ölkə siyasətində önəmli yer tutur. Bu gün cənab Prezident tərəfindən həyata keçirilən gənclər siyasəti yeni mərhələsini yaşayır. Azərbaycan dövləti sürətli inkişaf dövrünü yaşayır və bu inkişaf təbii ki, gənclər üçün yeni imkanlar açır. Azərbaycanın maliyyə-iqtisadi imkanları artdıqca, bütün sahələrin inkişafına kapital qoyulur və bu, çox müsbət nəticələr verir. Təbii ki, gənc nəsil bu prosesdən kənarda qalmayıb və gəncliyin inkişafı, yüksək intellektli, vətənpərvər gəncliyin yetişməsi üçün çox əhəmiyyətli layihələr həyata keçirilir. Prezident İlham Əliyevin rəhbərliyi ilə ölkəmizdə həyata keçirilən siyasətin başlıca istiqamətlərindən biri gənclərə dövlət dəstəyinin gücləndirilməsindən, onlara hərtərəfli diqqət göstərilməsindən ibarətdir.

-Rahim, Azərbaycan  gənclərini  necə  görmək  istəyirsən?

- Atalarımız  deyib  ki, elm ağlın çırağıdır. Elm, fərasət olmazsa, işlərini düzgün qura, başqalarına xeyir verə, özünü idarə edə bilmərsən. Öyrənmək, araşdırmaq, axtarmaq,  hər mövzudan, xəbərdən məlumatlı olmaq.  Bir  sözlə, Vətənimin  gənclərini  qabaqcıl, müasir, vətənpərvər, savadlı və peşəkar gənclik olaraq  görmək istəyirəm.

Yaqut  Ağaşahqızı, “İki sahil”