Qədim və heyrətamiz gözəlliyə malik Qəbələ şəhəri məndə zəngin təəssürat oyatdı. Bu rayonda ən müasir turizm obyektlərinin, qədim tarixi abidələrin, mənzərəli yerlərin şahidi olduğum üçün çox sevinirəm.
Bu fikirləri AZƏRTAC-a müsahibəsində “Ölkəmizi tanıyaq” devizi ilə Qəbələ-Şəki-Zaqatala marşrutu üzrə keçirilən tur-aksiyanın iştirakçısı, Ağdaşın Orta Ləki kənd orta məktəbinin X sinif şagirdi Kamil Məcnunov deyib.
Ağdaşlı məktəbli sürətlə inkişaf edən Azərbaycanın qazandığı uğurların onu sevindirdiyini bildirib. “Biz Prezident İlham Əliyevin təşəbbüsü ilə reallaşan tur-aksiya çərçivəsində səfər etdiyimiz rayonlarda bu inkişafın bir daha şahidi olduq. Bizə gündən-günə çiçəklənən ölkəmizin hər guşəsini tanımağımız üçün lazımi şərait yaradılır. Qəbələyə səfər etmək mənim çoxdankı arzum idi. Biz tur-aksiya çərçivəsində həm maariflənir, həm də payız tətilini səmərəli keçiririk”, - deyə Kamil Məcnunov qeyd edib.