15 sentyabr 1918-ci il: Türk birliyinin əbədiyyət tarixi
Qardaş da, dost da dar gündə sınanır
Təqvimimizdə özünəməxsusluğu ilə seçilən, “yüzilliklər”i ilə fərqlənən 2018-ci il salnaməmizdə yeri, mənəvi, tarixi əhəmiyyəti, dövlətçiliyimizin möhkəmlənməsi baxımından da yaddaqalandır.
Prezident İlham Əliyevin Sərəncamına əsasən respublikamızda və ölkəmizin hüdudlarından kənarda qeyd olunan və bu gün də ruh yüksəkliyi ilə davam edən Azərbaycan Xalq Cümhuriyyətinin (AXC) 100 illik yubileyi tədbirlərində zəngin dövlətçilik ənənələrinə malik Azərbaycan xalqının qəhrəmanlıq salnaməsi vərəqlənir, imperiyanın təzyiq və təhdidlərinə məruz qalan cümhuriyyətçilərin çətin şəraitdə belə göstərdikləri mətanət, mərdlik ictimaiyyətə çatdırılır.
O illər xatırlanarkən daha çox diqqətçəkən məqamlardan, AXC-nin az da olsa yaşamasına dəstək göstərən, soydaşlarımızı qətlə yetirən bolşevik-daşnak birləşmələrinə qarşı mübarizədə Azərbaycan xalqına dost, qardaş köməyini əsirgəməyən Qafqaz İslam Ordusu (QİO) haqqında da ehtiramla danışılır.
15 sentyabr 1918-ci ildə türk sərkərdəsi Nuru paşanın rəhbərlik etdiyi Qafqaz İslam Ordusu nəinki Bakını, Bakıətrafını, bir çox əraziləri erməni-bolşevik əsarətindən xilas etdi. O dövrdə törətdikləri faciələri ört-basdır etmək üçün ingilis qoşunlarını Bakıya dəvət edən eser və daşnakların gizli planlarını alt-üst edən Nuru paşanın əsgərlərinin hücumlarına davam gətirməyən düşmənlər məğlub edildilər.
...Ötən əsrin əvvələrində Azərbaycan yenicə müstəqillik əldə etsə də imperiya neft səltənəti olan bu diyarı əldən vermək istəmirdi. Ermənilər bolşevik Rusiyasının köməyi ilə Bakıda, digər bölgələrdə kütləvi qırğınlar törədir, insanları qətlə yetirir, diri-diri yandırır, ağlasığmaz vəhşiliklər törədirdilər. Görənləri dəhşətə gətirən Quba məzarlığı o illərdə ermənilərin soydaşlarımıza və yəhudilərə qarşı törətdikləri soyqırımlar nəticəsində yaranan yüzlərlə qəbiristanlıqlardan yalnız biridir.
Bakı sovetində çoxluq təşkil edən eser və daşnaklardan ibarət xəyanətkarlar istəyirdilər ki, Bakıya çağırılan ingilislər Qafqaz İslam Ordusunu məhv etməklə onların mövqelərini möhkəmləndirsinlər. Amma türkün mərdliyi və şücaətindən xəbərsiz olan daşnak töküntüləri seçimlərində yanıldılar. Çətinliklə qazanılmış müstəqilliyin təhlükədə olduğunu hiss edən AXC rəsmiləri Türkiyəyə müraciət edərək ondan kömək istədilər. Türkiyə Silahlı Qüvvələrinin komandanı, general Ənvər paşa Azərbaycanın hərbi yolla xilasına Qafqaz İslam Ordusunun yaradılması ilə başladı. Həmin ordunun qarşısına Azərbaycanı və Dağıstanı erməni-bolşevik Rusiyasının işğalından azad etmək vəzifəsi qoyuldu.
Azərbaycanın istiqlalı uğrunda mübarizə aparan soydaşlarımıza yardım göstərən, bolşeviklərin və erməni millətçilərinin soydaşlarımıza qarşı törətdikləri soyqırımların qarşısını alan, Nuru paşanın komandanlığı altında Bakıya gələn Qafqaz İslam Ordusunun qəhrəmanlığına, zəfər gününə təsadüf edən 15 sentyabr 1918-ci il türk birliyinin, qardaşlığının nümunəsi oldu.
Nuru paşa ordunu təşkil etdiyi müddətdə ermənilər Bakıda, həmçinin ölkənin digər bölgələrində azərbaycanlılara qarşı, sözün əsl mənasında, soyqırımları həyata keçirdilər. Naxçıvanda, Zəngəzur, İrəvan mahallarında, Qubada, Neftçalada, Zaqatalada, Şuşada, Dağlıq Qarabağda on minlərlə günahsız, əliyalın insan erməni vəhşiliyinin qurbanı oldu. Erməni-bolşevik silahlılarının Bakı şəhərində 30-31 mart tarixlərində qətlə yetirdikləri azərbaycanlılar Çəmbərəkənd adlanan yerdə basdırıldılar. Hərb sənətinə mükəmməl yiyələnmiş, istənilən döyüş tapşırığını qalibiyyətlə başa çatdırmağa qabil olan Qafqaz İslam Ordusu daşnakların əlində olan Bakını və digər yaşayış məntəqələrini düşməndən azad etdi.
Türk əsgərlərinin hücumlarına tab gətirməyən erməni-bolşevik-eser silahlı dəstələrinin tör-töküntüləri Bakını əllərində saxlamağa çalışalar də türkün qarşısında acizliklərini məğlubiyyətləri ilə təsdiqlədilər. Nuru paşanın ordusu həlledici hücuma keçərək düşmənin ordusunu dağıtdı. Daşnak tör-töküntüləri gəmilərə doluşub qaçmaqla canlarını qurtardılar.
Beləliklə, 15 sentyabr 1918-ci ildə Bakı Türkiyənin hərbi köməyi ilə istiladan xilas olaraq həqiqi sahiblərinə qaytarıldı.
Həmin hadisələrdə daşnaklar 2 min əsgərini itirdilər. Döyüşlərdə altı mini azərbaycanlılar olmaqla 14 min silahlısı olan Qafqaz İslam Ordusunun 139 əsgəri, 9 zabiti qəhrəmancasına şəhid oldu, 463 nəfər yaralandı. Bu gün şəhidlər xiyabanında 1918-ci ildə həlak olan türk əsgərlərinin xatirəsinə əbədi hörmət rəmzi olan abidə hər bir azərbaycanlı üçün müqəddəs məkandır. Ermənilərin törətdikləri, tarixə Mart qırğını kimi yazılmış 1918-ci il hadisələrinin davamı isə 20 Yanvar faciəsi, Xocalı soyqırımıdır. Bu ağrı-acılar Azərbaycanın salnaməsinə yazılan və hər zaman xatırlanan tarixlərdir. Ümummilli lider Heydər Əliyevin “31 Mart Azərbaycanlıların soyqırımı haqqında” Fərmanına uyğun olaraq hər il şəhid olmuş soydaşlarımızın, eyni zamanda, türk əsgərlərinin xatirələrinin ehtiramla yad olunması dostluq və qardaşlığın ifadəsidir.
Hər hansı milli, etnik, irqi və ya dini qrupun qismən və ya bütövlükdə məhv edilməsi məqsədilə törədilən soyqırım üzrə Beynəlxalq Cinayət Tribunalının sənədlərində qeyd olunur ki, əgər soyqırıma xas olan cinayəti dövlət törətmişsə o zaman digər beynəlxalq cinayətlərdə olduğu kimi, məsuliyyətə yalnız fərdi şəxslər deyil, həm də dövlət cəlb edilməlidir. 1918-ci ildə olduğu kimi Ermənistan bu gün də qanlı terrorların müəllifidir. Faşistlərin törətdikləri Xatun qətliamı, yəhudilərin kütləvi qırğını ilə tarixə yazılan Xolokosta , Ruanda, Serebrenitsa faciələri minlərlə günahsız insanın vəhşicəsinə qətlə yetirilməsi kimi tarixə yazılsa da erməni vəhşiliyinin qanlı nümunəsi olan Xocalı soyqırımı illərdən bəri davam etdirilən qətliamların ən dəhşətlisi idi. Xocalıda qana susamış ermənilər yenə də gorbagorları kimi vəhşiliklərini davam etdirirlər. Ermənistanın qaniçənliyini bəşəriyyətə xəyanət adlandıran Azərbaycan və türk xalqları bu gün də terrora dəstək göstərən erməniləri lənətləyir. ölkənin dövlət və hökumət başçılarının, rəsmi nümayəndələrinin də qeyd etdikləri kimi, strateji tərəfdaşlığımızın əsasında terrora qarşı birgə mübarizədə əsrlərə söykənən monolit birlik dayanır. Prezident İlham Əliyevin qeyd etdiyi kimi, türk dünyası birliyinin əsasını qoyan Mustafa Kamal Atatürk- Heydər Əliyev ideyalarına sadiqlik Türkiyə Azərbaycan qardaşlıq və dostluğu əbədiyaşarılıq nümunəsidir . Dar gündə belə sınaqdan çıxmış bu dostluq erməni lobbisinə qarşı mübarizədə də sarsılmazdır. Təsadüfi deyil ki, belə qardaşlıq telləri ilə bağlanan, illərin sınağında bərkiyən Türkiyə-Azərbaycan dostluğu bu gün strateji tərəfdaşlıq səviyyəsinə yüksəlmişdir.
Türk dünyasını birləşdirən güc: Azərbaycan-Türkiyə dostluğu
Türk dünyasının öndərləri sayılan ulularımızın- Mustafa Kamal Atatürk və ümummilli lider Heydər Əliyevin türkçülük ideyalarına sadiq qalan və bu irsi daha geniş mənada davam etdirən Prezident İlham Əliyev dünya siyasətinə təsir imkanları artan türkdilli dövlətlərlə qarşılıqlı faydalı əməkdaşlığı genişləndirmək, inkişaf etdirmək, beynəlxalq təşkilatlarda Azərbaycanın mövqeyini gücləndirmək istiqamətində mühüm addımlar atmışdır. Türk dövlətlərinin vahid ideya və məqsədlər uğrunda mübarizəsini gücləndirmək dövlət başçımızın ən çox diqqət göstərdiyi məsələlərdəndir.
Bakıda keçirilmiş Dünya azərbaycanlılarının II qurultayında, Azərbaycan və türk diaspor təşkilatlarının I forumunda, Türkdilli dövlət və cəmiyyətlərinin XI dostluq, qardaşlıq və əməkdaşlıq qurultayında, Türkdilli ölkələrin dövlət başçılarının Naxçıvanda keçirilən IX zirvə görüşündə respublikalararası siyasi, iqtisadi və mədəni əlaqələrin genişləndirilməsinə xusisi diqqət göstərilmişdir. TÜRKSOY-un, Türkdilli Akademiyanın, Türkdilli Ölkələrin Parlament Assambleyasının yaradılması bir daha təsdiqləyir ki, eyni köklərə, oxşar talelərə malik türk xalqları əsrlər boyu formalaşmış dostluq və qardaşlıq ənənələrini bu gün də qoruyub saxlayır. Astanada keçirilən Qazax xanlığının 550 illik yubileyində çıxış edən Prezident İlham Əliyev türk dünyasının birlik və həmrəyliyi üçün başlıca amil olan Azərbaycan-Türkiyə dostluq və qardaşlığından bəhs edərək bildirdi ki, türkdilli ölkələrin əməkdaşlığı, bizim ortaq tariximiz, ortaq mədəniyyətimiz etnik köklərlə bağlıdır. Bütün görüşlərdə tarixin zaman kəsiyində türklərə qarşı ədalətsizlikləri də diqqətə çatdıran, Dağlıq Qarabağ münaqişəsi zamanı soydaşlarımıza qarşı törədilən vəhşilikləri etnik təmizləmə siyasəti adlandırmaqla torpaqlarımızın işğalını yolverilməz hesab edən cənab İlham Əliyevin sözlərində türk xalqlarının birlik və həmrəylikləri əksini tapır: “Nəinki Dağlıq Qarabağ, eyni zamanda qədim türk torpağı olan Zəngəzur da bizim əzəli torpağımızdır. XX əsrin əvvəllərində Zəngəzuru Azərbaycandan ayırıb Ermənistana verməklə əslində bütün türk dünyasının coğrafi bağlılığını aradan götürüblər.”
Türk dövlətlərini siyasi-iqtisadi əlaqələr, vahid enerji diplomatiyası birləşdirir
Dünyanın enerji xəritəsini dəyişən, Azərbaycanın təşəbbüsü ilə reallaşan enerji layihələri bir həqiqəti təsdiqlədi: Türkiyə, Azərbaycan, Qazaxıstan və Türkmənistan lider dövlətlər kimi Avropanın geoiqtisadi siyasətində aparıcı amildir. Maraqlı və diqqətçəkən məqam budur ki, dünyanın enerji xəritəsində yaranan yeni imkanlar, yerdəyişmələr, əvvəllər enerji bazarında əvəzolunmaz gücü ilə liderlik edən dövlətlərin arxa planda yer alması yeni layihələr uğrunda mübarizəni gücləndirir. Sevindirici haldır ki, bu rəqabətdə dəyişilməz mövqeyi və təbii ehtiyatları ilə ilk sırada dayanan türk dövlətlərinin dünyanın enerji bazarındakı rolu artmaqda və möhkəmlənməkdədir. Təbii resurslardan istifadədə regional təhlükəsizliyə diqqət yetirilməsində, enerji- nəqliyyat- kommunikasiya marşrutlarının reallaşması nəticəsində bölgədə strateji əməkdaşlığın gücləndirilməsində türk dövlətlərinin geosiyasi üstünlüyü başlıca faktordur. Milli- mənəvi bağlılığı ilə dostluq və qardaşlıq əlaqələrini möhkəmləndirən, təbii qaz ehtiyatlarının həcminə görə də regionda strateji əhəmiyyəti ilə seçilən bu dövlətlərin iqtisadi birliyi bütünlükdə türk dövlətlərinin qüdrətini artırır.
BTC, BTƏ kimi neft, qaz kəmərlərinin davamı olan “Cənub Qaz Dəhlizi”nin, TANAP-ın, Bakı-Tbilisi-Qars dəmir yolunun istifadəyə verilməsi, TAP-da işlərin sürətlənməsi Azərbaycan- Türkiyə birliyinə hər vasitə ilə xələl gətirməyə çalışan qüvvələri, onların maliyyələşdirdikləri dairələri, terror birləşmələrini qıcıqlandırır.
PKK, İŞİD kimi terror birləşmələrinin həmlələrinə gücü, qüdrəti ilə cavab verən, Dağlıq Qarabağ münaqişəsinin Azərbaycanın ərazi bütövlüyü və beynəlxalq hüquq normaları əsasında həllinə çalışan Azərbaycanın siyasətinə dəstək olan Türkiyə beynəlxalq səviyyələrdə aparılan müzakirə və danışıqlarda ölkəmizin mövqeyini dəstəkləyir. Ermənistanla sərhədlərini bağlayan, münaqişə həllini tapmayınca təcavüzkarla iqtisadi , siyasi sahədə əməkdaşlığı qeyri-mümkün adlandıran Türkiyənin siyasətinə sadiq qalması bütünlükdə türk dünyasının güclənməsinə xidmət edir. Enerji layihələrinin yalnız Türkiyə ərazisindən keçəcəyini israr edən Azərbaycanın dost ölkə ilə əməkdaşlığı dövlətlərarası münasibətlərə yaxşı nümunədir. Siyasi, iqtisadi, mədəni, ticari, ən başlıcası isə hərbi sahədə əməkdaşlığı genişləndirən Azərbaycan qardaş ölkələrə, ilk növbədə, Türkiyəyə böyük investisiyalar ayırır. “Bizim Türkiyəyə sərmayələrimizin həcmi yaxın illərdə 20 milyard dollara çatacaq. Bu, bizim dostluğumuzu, qardaşlığımızı əks etdirir, eyni zamanda, Türkiyənin çox böyük iqtisadi potensialını göstərir” söyləyən Prezident, İlham Əliyevin vurğuladığı kimi “Böyük iyirmilər””in aparıcı ölkələrindən olan Türkiyə dünya miqyasında böyük gücə çevrilib.
Dövlət çevrilişinə cəhd olan 15 iyul hadisələrinin qarşısı bu gücün, xalqla dövlətin birlik və həmrəyliyi nəticəsində alındı.
Dünyanın enerji xəritəsini dəyişən Azərbaycan beynəlxalq nəqliyyat infrastrukurunun coğrafiyasını da yeniləyir. “Bakı-Tbilisi-Qars dəmir yolu kimi nəhəng infrastruktur layihəsi fəaliyyətdədir. Bu yol Asiyanı Avropa ilə birləşdirir və bu yolla yükdaşımalarının həcmi artır və artmalıdır. Bu, yeni nəqliyyat dəhlizidir, yeni nəqliyyat damarıdır. Azərbaycan dost, qonşu ölkələrlə birlikdə bu layihənin icrası ilə Avrasiyanın nəqliyyat xəritəsini yenidən tərtib etmiş olur. Nəzərə alsaq ki, nəqliyyat baxımından bu, çox əlverişli yoldur, mən bütün dost ölkələri bu yoldan istifadə etməyə çağırıram, o cümlədən Avropa ölkələrini, Macarıstanı, Özbəkistanı, Qırğızıstanı. Artıq Qazaxıstan, Türkiyə, Azərbaycan bu yoldan istifadə edir” sözləri ilə bu dostluq və qardaşlıq yolunun bir məqsədə, regionda təhlükəsizlik və əməkdaşlığın gücləndirilməsinə xidmət etdiyini də göstərir.
Əlaqələr gündən-günə möhkəmlənir və genişlənir
Qırğızıstanda keçirilən Türkdilli Dövlətlərin Əməkdaşlıq Şurasının VI Sammiti beynəlxalq aləmdə türk birliyinin önəmini bir daha göstərdi.
Sammitdə çıxış edərək “Bizim əlaqələrimiz siyasi, iqtisadi, ticarət, energetika, nəqliyyat, humanitar sahələri əhatə edir və biz bütün istiqamətlər üzrə gözəl nəticələr görürük. Ölkələrimiz beynəlxalq təşkilatlarda da bir-birinə dəstək verir və bu dəstək çox önəmlidir. Hesab edirəm ki, gələcək illərdə beynəlxalq təşkilatlar çərçivəsindəki fəaliyyətimizlə bağlı əlavə addımlar atılacaqdır” söyləyən Prezident İlham Əliyev vurğuladı ki, yeni risklərin, təhdidlərin yarandığı, münaqişə, müharibə ocaqlarının törətdiyi fəlakətlərin artdığı müasir dövrümüzdə dövlətlərarası əməkdaşlığın gücləndirilməsi, regional təhlükəsizlik məsələləri xüsusi əhəmiyyət daşıyır.
Dağlıq Qarabağ və onun ətrafında yerləşən 7 rayonu işğal altında saxlayan Ermənistanın təcavüzkar siyasəti nəticəsində bir milyondan çox azərbaycanlının öz doğma torpağında qaçqın və köçkün vəziyyətinə düşdüyünü Sammit iştirakçılarının diqqətinə çatdıran cənab İlham Əliyev xalqımıza qarşı etnik təmizləmə siyasəti, hərbi cinayətlər, Xocalı soyqırımını törədən Ermənistanın terrora dəstəyini pisləmiş və vurğulamışdır ki, canilər ədalət qarşısında cavab verməlidirlər . Təsadüfi deyil ki, 20 il ərzində Ermənistana rəhbərlik etmiş kriminal rejim çökdü. Yeni iqtidar isə hələ də kompromis barədə fikirləşmir. BMT Təhlükəsizlik Şurasının, nüfuzlu beynəlxalq təşkilatların münaqişə ilə bağlı qəbul etdikləri və hüquqi baza olan qətnamələri yerinə yetirməkdən imtina edən Ermənistanın silahlı qüvvələri Azərbaycan torpaqlarından dərhal və qeyd-şərtsiz çıxarılmalıdır.
Azərbaycanın tolerantlıq təcrübəsinin dünya siyasətində dəstəklənməsinin, multikultural ənənələrinin təbliği də göstərir ki, terroru dəstəkləyən Ermənistanla müqayisədə Azərbaycan daim sülh və əməkdaşlıq tərəfdarı olduğunu dəyişilməz xarici siyasəti ilə bildirir.
Ölkəmizdə I Avropa Oyunlarının, IV İslam Həmrəyliyi Oyunlarının, olimpiadaların keçirilməsi Azərbaycanın millətlərarası, dinlərarası multikulturalizmə verdiyi töhfənin təzahürüdür.
Türk dövlətləri birliyini təmin edən TÜRKSOY-da Azərbaycanın layiqincə təmsil olunması da ölkəmizin mənəvi dəyərlərə göstərdiyi hörmət və ehtiramın ifadəsidir.
Türkiyə Prezidenti Rəcəb Tayyib Ərdoğanın bütün səviyyələrdə ifadə etdiyi “Azərbaycan bizim ailəmizin üzvüdür”, Prezident İlham Əliyevin “Türkiyə-Azərbaycan birliyi, qardaşlığı həm ölkələrimiz üçün, həm xalqlarımız üçün, bölgəmiz üçün, Avrasiya üçün önəmli amildir” sözləri əsrlərin dostluğunu, qardaşlığını özündə ehtiva etməklə illərin sınağından çıxmış qarşılıqlı sədaqəti, inamı, etibarı göstərir.
Xuraman İsmayılqızı, “İki sahil”