“Apple” kompaniyası növbəti ildə “iPhone X” bazasında üç yeni smartfon istehsal edə bilər.

AZƏRTAC xəbər verir ki, bu barədə “Macrumors” portalı “KGI Securities” kompaniyasının analitiki Minq-Çi Kuonun hesabatına istinadla məlumat yayıb.

Onun proqnozuna görə, iki yeni model 5,8 və 6,5 düym diaqonallı (müvafiq olaraq düymə 458 və 480-500 piksel) OLED-displeylə, üçüncüsü isə 6,1 düym diaqonallı (düymə 320-330 piksel) LCD-displeylə təchiz olunacaq.

Hər üç smartfon dizayn etibarilə “iPhone X” modelinə bənzəyəcək və “True Depth” kamerasına malik olacaq. Ekspertin fikrincə, LCD modelinin qiyməti 649-749 dollar təşkil edəcək. OLED modelinin qiyməti isə məlum deyil.

Bir qədər əvvəl “KGI Securities” 2018-ci ilə qədər “Apple”nin “Touch ID” texnologiyasından (smartfonun barmaq izi ilə açılması) tamamilə imtina edəcəyini və “Face ID” texnologiyasına (telefon sahibinin üzünün tanınması) keçəcəyini proqnozlaşdırmışdı. Həmçinin OLED-modelinin korpusunun paslanmayan metaldan hazırlanacağı gözlənilir.