Tədqiqatçılar aqressiv prostat xərçəngi ilə əlaqəli beş növ bakteriya müəyyən ediblər. Ümid edilir ki, tapıntılar bu bakteriyaları hədəf alan və aqressiv xəstəliyin inkişafını yavaşladan və qarşısını alan müalicələrə yol açmağa kömək edə bilər.
“Biz artıq infeksiyalar və xərçəng arasında güclü əlaqə olduğunu bilirik”,-deyə Şərqi İngiltərə Universitetinin (UEA) Norviç Tibb Məktəbinin professoru, layihə rəhbəri Kolin Kuper bildirib.
“Məsələn, həzm sistemində Helicobacter pylori bakteriyasının olması mədə xorasına səbəb ola bilər və mədə xərçəngi ilə əlaqələndirilir, HPV virusunun bəzi növləri isə uşaqlıq boynu xərçənginə səbəb ola bilər.
“Bəzi prostat xərçənginin digərlərindən daha aqressiv olmasına səbəb olan şeylər haqqında çox az şey məlum idi. İndi bəzi bakteriyaların bu işdə iştirak etdiyinə və tapmacanın bir hissəsi olduğuna dair sübutlarımız var." ,-deyə layihə rəhbəri əlavə edib.
Qrup Norfolk və Norviç Universitetləri Xəstəxanasında, Quadram İnstitutunda və digər əməkdaşlarla birlikdə prostat xərçəngi olan və ya olmayan 600-dən çox xəstənin sidik və ya toxuma nümunələri üzərində uzunmüddətli təhlillər aparıb.
Komanda tərəfindən tapılan yeni bakteriya növlərindən ikisi tədqiqatı maliyyələşdirən iki təşkilatın adına uyğun “Porphyromonas bobii” və “Varibaculum prostatecancerukia” adlandırılıb.
Komanda tərəfindən tapılan bakteriyalara Anaerokok, Peptoniphilus, Porphyromonas, Fenollaria və Fusobacterium daxildir.
Bütün bu bakteriyalar oksigen olmadan böyüyə bilirlər.
Xəstənin nümunələrində bu xüsusi anaerob bakteriyalardan hər hansı biri aşkar edildikdə, bu, daha yüksək dərəcəli prostat xərçənginin olması və aqressiv xəstəliyin daha sürətli irəliləməsi ilə əlaqələndirilib.
“Biz, həmçinin bu bakteriyaların xərçənglə necə əlaqəli ola biləcəyinin potensial bioloji mexanizmlərini müəyyən etdik.
"Hələ bilmədiyimiz şeylər arasında insanların bu bakteriyaları necə qəbul etmələri, onların xərçəngə səbəb olub-olmaması və ya zəif immunitet reaksiyasının bakteriyaların böyüməsinə icazə verib-verməməsi var”,-deyə həkim Hurst qeyd edib.
“Ancaq ümid edirik ki, tapıntılarımız və gələcək işimiz aqressiv prostat xərçənginin inkişafının qarşısını ala biləcək yeni müalicə variantlarını ortaya çıxaracaq.
Tədqiqatçılar, həmçinin qeyd ediblər ki, bir çox bakteriya insan həyatı üçün faydalıdır və faydalı bakteriyaların təmin etdiyi müdafiəni aradan qaldırmadan zərərli bakteriyaları orqanizmdən çıxarmaq asan məsələ deyil.
“Prostate Cancer U.K”nin tədqiqat meneceri Hayley Luxton bunu kişilər üçün müalicəni həqiqətən inqilabi etmək potensialına malik olan həyəcanverici bir kəşf adlandırıb və bildirib ki, hər il minlərlə insanın həyatını xilas edə biləcək böyük bir irəliləyişə yol açacaq.
Nubar Süleymanova, “İki sahil”
