Portuqaliya parlamenti tibbi yardım zamanı baş verən ölümün cinayət hesab edilməməsi haqqında qanunu təsdiqləyib. Yəni, tam evtanaziyaya icazə verib.

Bu günə qədər Portuqaliyada yalnız passiv evtanaziyaya icazə verilirdi - həkimlərin sağalmaz bir xəstə üçün baxım terapiyasını dayandırması ilə. Məsələn, ventilyatoru söndürməklə. İndi Respublika Şurası (Portuqaliyanın birpalatalı parlamenti) aktiv evtanaziyaya - xəstəyə tez və ağrısız ölümü təmin edən dərmanlar verilməsini qəbul edib. Hətta xüsusi “ölüm kapsulu” da var ki, havaya azot vurur və xəstə sevinclə yuxuya gedir.

Bununla belə, parlament ikinci dəfədir ki, Portuqaliyanı "yaxşı ölüm" (yunancadan evtanaziya. εὖ - yaxşı və θάνᾰτος - ölüm) tətbiq edən ölkələr siyahısına daxil etməyə çalışır. İlk dəfə Konstitusiya Məhkəməsinin etirazı və respublika Prezidenti və katolik Marsel Rebelo de Souzanın kəskin məzəmməti səbəbindən “şuralar”ın qərarı qüvvəyə minə bilməyib. Lakin ölkə konstitusiyasına görə, təkcə prezidentin narazılığı yetərli deyil - o, təşəbbüsü imzalamağa borcludur və əgər bu dəfə Konstitusiya Məhkəməsi evtanaziyaya etiraz etməsə, onun Portuqaliyada qanuna çevrilmək şansı var.

Portuqaliyanın aktiv evtanaziya ilə bağlı qanunu 2021-ci ildə krallığın parlamenti tərəfindən təsdiqlənən İspaniya qanununa bənzəyir. O, bütün “tikanları” uğurla keçərsə, Portuqaliya dünyada "yaxşı ölüm"ə icazə verən doqquzuncu ölkə olacaq. Bu günə qədər dünyada aktiv evtanaziyaya icazə verilən cəmi 8 ölkə var - bunlar Hollandiya, Belçika, Lüksemburq, Kolumbiya, Kanada, İspaniya, Yeni Zelandiya və İsveçrədir. Bununla belə, aktiv evtanaziyaya yalnız bir ştatında icazə verilən bir ölkə də var - bu, Avstraliyadır.

Nubar Süleymanova, “İki sahil”