14 iyun 2024 01:35
201

Yaxın Şərq və Asiya 2024-cü ildə qlobal neft və qaz investisiyalarını idarə edəcək - BEA

Beynəlxalq Enerji Agentliyinin (IEA) hesabatında deyilir ki, Yaxın Şərq və Asiyada milli neft şirkətləri 2024-cü ildə qlobal neft və qaz investisiyalarının 7 % artmasına böyük töhfə verəcəyi gözlənilir.

Agentlik illik Dünya Enerji İnvestisiya hesabatında bildirib ki, qlobal apstrim xərclərinin 2024-cü ildə 2023-cü ilə oxşar səviyyədə olacağını, təxminən 570 milyard dollara çatacağını proqnozlaşdırır.

Dünya üzrə ümumi enerji sərmayəsinin ilk dəfə olaraq 2024-cü ildə 3 trilyon dolları keçəcəyi proqnozlaşdırılır. Hesabatda deyilir ki, təxminən 2 trilyon dollar ekoloji təmiz texnologiyalara, o cümlədən bərpa olunan enerji mənbələrinə, elektrik nəqliyyat vasitələrinə, nüvə enerjisinə, şəbəkələrə, anbara, aşağı emissiyalı yanacaqlara, səmərəliliyin artırılmasına və istilik nasoslarına yönəldiləcək.

“Təmiz enerji sərmayəsi hətta çətin iqtisadi şəraitdə belə yeni rekordlar qoyur və yeni qlobal enerji iqtisadiyyatının arxasındakı sürəti vurğulayır. Bu gün ənənəvi yanacağa gedən hər dollara qarşılıq demək olar ki, iki dollar təmiz enerjiyə yatırılır”, - BEA-nın icraçı direktoru Fatih Birol bildirib.

Neft və qaz şirkətlərinin təmiz enerjiyə sərmayələri 2023-cü ildə 30 milyard dollara çatıb ki, bu da sənayenin ümumi kapital xərclərinin yalnız 4 %-ni təşkil edir. Buna baxmayaraq, 2023-cü ildə kömürə olan yatırımlar da az olmayıb, hətta kömür investisiyası 2015-ci ildən bəri ən yüksək göstəriciyə çatıb.

Nubar Süleymanova, “İki sahil”