Çin ilə ABŞ arasında ticarət mübahisələrinə dair yüksəksəviyyəli danışıqların növbəti raundu Malayziyada keçiriləcək.

“İki sahil” xəbər verir ki, bu barədə Çinin Kommersiya Nazirliyi açıqlama yayıb.

Baş nazirin müavini Hı Lifenin rəhbərlik edəcəyi Çin nümayəndə heyəti oktyabrın 24-27-də Malayziyada səfərdə olacaq.

Nazirliyin açıqlamasında deyilir ki, tərəflər iki ölkənin dövlət başçılarının telefon danışıqları zamanı əldə etdikləri mühüm konsensusa uyğun olaraq Çin-ABŞ iqtisadi və ticarət əlaqələrinin vacib məsələləri ilə bağlı məsləhətləşmələr aparacaqlar.

Qeyd edək ki, cari il ərzində iki ölkə arasında iqtisadi-ticarət məsələlərinə dair bir neçə dəfə yüksəksəviyyəli danışıqlar keçirilib. Həmin danışıqlarda, habelə dövlət başçılarının telefon danışıqlarında müəyyən razılaşmalar əldə olunsa da, həllini gözləyən bir çox məsələ var.