“Şəhərsalma və Memarlıq ili” çərçivəsində “12 Avqust - Beynəlxalq Gənclər Günü” münasibətilə “Zəfərdən Qayıdışa” layihəsi çərçivəsində Lənkəran-Astara region gəncləri  Qarabağa səfər ediblər .

Səfər çərçivəsində cənublu  gənclər əvvəlcə Füzuli şəhərinə baş çəkiblər. Burada qəhrəman Vətən övladların qanı bahasına  işğaldan azad olunmuş ərazilərdə həyata keçirilən genişmiqyaslı bərpa və yenidənqurma işləri, müasir şəhər infrastrukturu və “Böyük Qayıdışa dair l Dövlət Proqramı” nın icrası ilə əlaqədar görülən işlərlə yaxından  tanış olublar. Füzulidə quruculuq prosesinin canlı şahidi olan gənclər şəhərin qısa müddətdə müasir, rahat yaşayış məkanına çevrilməsi istiqamətində atılan addımları yaxından görüb,  ölkəmizin hazırda dinamik inkişafından qürur hissi keçiriblər.

Səfərin növbəti ünvanı isə Azərbaycanın mədəniyyət paytaxtı, Qarabağın incisi Şuşa şəhəri olub. Onlar  Şuşanın əsrarəngiz təbiəti, eləcə  tarixi-mədəni irsi ilə tanış olaraq şəhərin mühüm məkanlarını ziyarət ediblər.

Səfər zamanı İsa bulağında olan gənclər Şuşanın zəngin təbiətinin qoynunda bu tarixi məkanın özünəməxsus atmosferini yaşayıblar. Həmçinin  Yuxarı Gövhərağa məscidini ziyarət edən gənclər Şuşanın zəngin dini-memarlıq irsindən ətraflı məlumat alıblar.

Yadda qalan səfər  gənclər üçün həm Zəfər tariximizin, həm də işğaldan azad edilmiş torpaqlarda həyata keçirilən Böyük Qayıdış və quruculuq prosesinin canlı mənzərəsini görmək baxımından xüsusi əhəmiyyət daşıyıb.

Zəfər Orucoğlu,
Azərbaycan Jurnalistlər Birliyinin üzvü