Çirkli, haram pulların yuyulması mexanizmini  sosial şəbəkələrdə Azərbaycan əleyhinə təxribatları ilə davam etdirən antimilli şəbəkə onları yemləyənlərə «bəçeşm» deyir

Bəzi bölgələrdə  el arasında belə bir ifadə işlədilir: «Zəmbərək dəvəsi.» Açması da odur ki,  ətrafda nə baş verir versin, dünya dağılsın arxayın dəvə gəvələməyinə davam edir, heç tükü də tərpənmir. Radikal müxalifətin  hadisələrə yanaşma tərzi həmin dəvələrin zəmbərək tavrına bənzəyir.  Birinci ildönümünü qeyd etdiyimiz Tovuz  hadisələrindən başlayaraq 44 gün davam edən Vətən müharibəsindəki  döyüşlərdə  Milli Ordumuzun  apardığı uğurlu əməliyyatlardan «xəbərsiz olan», atılan topların səsindən belə ayılmayan,  torpaqlarımızın azad olunmasına  sevinməyən   radikallar, onların törəməsi olan «beşinci kolon»un tör-töküntüləri  əksinə  çox üzüldülər. Çünki qalib Azərbaycan,  məğlub isə onların qrant mənbəyi Ermənistan idi.

Amma bir müddətdən sonra  səsləri çıxdı. Amma, necə?  Başladılar torpaqlarımızı 30 illik işğaldan azad edən Milli Ordumuzun Zəfərinə kölgə salmağa.  Gündəmdə qalmaq naminə  daim bəhrələndikləri  «manipulyasiya» metodlarına əl atan, ənənələrinə uyğun təxribat maşınlarını işə salan  «Milli Şura»nın, «beşinci kolon»un aparıcı simalarından olan Qənimət Zahid, Gültəkin Hacıbəyli, Sevinc Osmanqızı və  ətraflarındakılar virtual platformalarda, özlərinin yaratdıqları  sosial şəbəkələrdə yağışdan sonra  görünən göbələklər kimi baş qaldıraraq  eybəcərliklərini göstərdilər.  Vətən müharibəsindəki Qələbəmizə  qara yaxan bu naxələflərin erməni havadarlarını arxada qoyaraq Milli Ordumuzun döyüş bacarığını, şücaətini kiçiltmək üçün    söyləmədikləri böhtanlar, uydurmadıqları  yalanlar qalmadı. Ermənistan siyasətçilərinin  10 noyabr  Bəyanatını,  kapitulyasiya aktının imzalanmasını məğlubiyyətləri kimi  qəbul etmələrinə baxmayaraq  bizim «millilərimiz» Azərbaycanın Zəfərinə kölgə salmaq üçün dəridən, qabıqdan çıxırlar.

Ermənistanın xüsusi xidmət orqanları ilə əməkdaşlıq edən Qənimət Zahidin məsələ ilə bağlı  internet televiziyalarında daha çox fəallıq göstərməsi, reallıqları təhrif etmələri Qriqoryan kilsəsindən daha çox  dollar qoparmaq naminə  etdiyi gedişlərdir. Özlərini siyasətçi hesab etdikləri gündən ictimai etimad qazanmadıqları üçün populist vədlərlə gündəmdə qalmağa çalışan, iğtişaş və aksiya həvəskarları olan bu şarlatanlar heç vaxt xalq naminə bir addım belə atmayıblar. Əksinə, Azərbaycan  haqqında deyilən xoş sözlərə kölgə salmaq üçün qara piarlarını,  təxribatlarını gücləndirməklə  xəyanətləri müqabilində alacaqları  haram pulları düşünürlər. «Əbədi məğlublar» adını qazansalar belə illərdən bəri sadiq qaldıqları  «Xalqa nə qədər pisdirsə, bizə o qədər yaxşıdır» prinsipini hələ də davam etdirənlər onları şirnikləndirənlərin əmrlərini yerinə yetirməkdə israrlıdırlar. Çünki yemləri bu əmrləri verənlərdən gəlir.

 Praqmatik və rasional düşüncəli Prezident İlham Əliyevin illərdən bəri apardığı  uğurlu siyasətin kölgəsində itib- batsalar belə çamurdan baş qaldıran antiAzərbaycan şəbəkənin tör- töküntüləri hələ də  uğurlarımıza qara pərdə arxasından baxırlar. Dəfələrlə düşərgədə baş verən « yarpaq tökümü» ilə rastlaşsalar da, sosial bazalarından məhrum olsalar da aldıqları  qrantlar hesabına  yaratdıqları trolları şəbəkələrinə daxil edən  Qənimət Zahid, Sevinc Osmanqızı, Qurban Məmmədov, Vidadi İsgəndərli və  digər şəbəkə mənsubları ölkəmizə  düşmən mövqelərini yalanları ilə bildirməkdə davam edirlər. Qanunsuz aksiyalar keçirməklə aldıqları  çirkli pulların yuyulması mexanizmini indi sosial şəbəkələrdə Azərbaycan əleyhinə təxribatları ilə davam etdirən bu satqınlar Ermənistanda yaranan dözülməz vəziyyəti görmürlər, yaxud  görmək istəmirlər. Çünki özləri üçün pul kisəsi  hesab etdikləri  havadarları, erməni dayıları belə  məsləhət görürlər.

  Ölkəmizdə illərdən bəri aparılan siyasi, iqtisadi, sosial, demokratik islahatları, əhalinin məişət şəraitinin yaxşılaşdırılması istiqamətində davam etdirilən və xalq tərəfindən dəstəklənən siyasəti görməzdən gələn, pandemiya dövründə belə  inkişaf etmiş ölkələrdən fərqli olaraq insanları üzləşdikləri  çətinlikdən qurtarmaq üçün həyata keçirilən sosial islahatlar paketində nəzərdə tutulan güzəştləri,  sahibkarlara, aztəminatlı ailələrə edilən yardımları etiraf etməkdən çəkinən Sevinc Osmanqızının  üzdəniraq internet televiziyasında  olmayan bahalanmanı bəhanə gətirərək Azərbaycana qarşı qarayaxma kampaniyası aparması gülüncdür.  Pandemiya dövründə  ən qüdrətli ölkələrin  üzləşdikləri iqtisadi çətinlik beynəlxalq hesabatlarda yer alıb.  İkinci Qarabağ müharibəsini uğurla başa vuran,  müxtəlif ölkələrdən ən müasir silah-sursat almaq üçün milyardlarla vəsait sərf edən, hazırda  işğal edilmiş ərazilərdə aparılan  quruculuq- abadlıq işlərinin, infrastruktur layhələrinin tətbiqi üçün milyonlar sərf edən Azərbaycan haqqında «iqtisadi böhran» ifadəsini işlətmək, yalan söyləmək səviyyəsizlik. mənəviyyatsızlıqdır.

Vətən müharibəsindən sonra işğaldan azad olunmuş ərazilərə səfər edən,  gördükləri mənzərələrdən, erməni vəhşiliyindən dəhşətə gəldiklərini etiraf edən    xarici jurnalistlərdən, diplomatik korpus nümayəndələrindən fərqli olaraq bir dəfə də olsun işğalçı dövlətin torpaqlarımızda törətdikləri dağıntılar barədə  söz açmamaları, susmaları erməni təfəkküründən qaynaqlanan xəyanətdir.   Müharibədə ölən əsgərlərini, yaralılarını döyüş meydanında qoyub qaçan məğlub Ermənistandan fərqli olaraq Azərbaycanda  torpaqlarımız uğrunda canlarından keçən şəhidlərin xatirələri  ehtiramla anılır, onların ailələrinin sosial, mənzil- məişət problemlərinin həlli üçün davamlı layihələr həyata keçirilir. Şüurları kimi mənəviyyatları da erməniləşən, zombiləşən Qənimət Zahidin, Sevinc Osmanqızının gözləri o qədər kor olub ki, iqtisadi, sosial  böhran bataqlığında  çabalayan Ermənistandakı səfalətlə Azərbaycandakı intibahı belə görə bilmir, müqayisə aparmağa  xəyanətləri yol vermir.

Yazının əvvəlində  işlədilən  «zəmbərək dəvəsi» ifadəsinin nə səbəbə bu xəyanətkarlara aid olmasına aydınlıq gətirdik.  Artıq  təcrübəli bir sarvan lazımdır ki, qəflətdə  yatan bu zəmbərəklərin buruntaqlarını tərpədib,  milli mənsubiyyətlərini yada salsın. Susan, xəyanətə bulaşmış  vicdanları oyansın və desin: Elə cinayət var ki, bağışlanmır, bu Vətənə xəyanətdir. Vətəninə aid olmayan insanlığa da yaddır.  

Xuraman İsmayılqızı, «İki sahil»