Nəcəf Əhmədov: 20 Yanvar Azərbaycan xalqımın qürur günüdür

 Ukraynanın Dnepr şəhərində 20 Yanvar faciəsinin 32-ci ildönümü münasibətilə anım tədbiri olub.

“İki sahil” xəbər verir ki,  tədbir Dnepropetrovsk vilayəti Azərbaycanlıları Konqresinin təşkilatçılığı ilə Ukrayna-Azərbaycan mədəni-işgüzar mərkəzinin bazasında keçirilib.

Anım mərasimində diaspor üzvləri, Dnepropetrovsk vilayətinin rəsmi qurumlarının nümayəndləri, tələbələr iştirak ediblər. Öncə şəhidlərin ruhu bir dəqiqəlik sükutla anılıb. Sonra Dnepropetrovsk vilayəti Azərbaycanlıları Konqresinin sədri Nəcəf Əhmədov 1990-cı il yanvar ayının 19-dan 20-nə keçən gecə sovet rejiminin Azərbaycan xalqına qarşı həyata keçirdiyi kütləvi qırğının mahiyyəti və səbəbi haqqında geniş məlumat verib. "20 Yanvar xalqımızın qürur günüdür. Həmin gün müstəqillik yolunda ilk şəhidlərimizi verdik. Şəhidləri unutmadıq və unturmayacağıq"-deyə Nəcəf Əhmədov öz çıxışında qeyd edib. Digərləri də çıxış edərək bildiriblər ki, 20 Yanvar Azərbaycanın müasir tarixinə ən faciəli günlərdən biri, eyni zamanda, xalqımızın qəhrəmanlıq səhifəsi kimi daxil olub. Daha sonra 20 Yanvarla bağlı film nümayiş olunub.

Sonda Nəcəf Əhmədov Dnepropetrovsk vilayəti Azərbaycanlıları Konqresi və Dnepr Milli Texniki Universitetinin birgə keçirdiyi “Qara Yanvar: Azərbaycanın müstəqilliyinin dəyəri” mövzusunda esse müsabiqəsinin qaliblərinə diplomlar təqdim edib. Müsabiqə qalibləri bunlardır: Rodina Olqa (birinci yer), Samoylenko Tatyana (ikinci yer), Patretnaya Anastasiya (üçüncü yer). Bandur Evgeniya isə müsabiqə essesinin hazırlanmasına yaradıcı yanaşmasına görə mükafatlandırılıb.