Azərbaycan dünyada neft və qaz ilə yanaşı, həm də elektrik enerjisi ixracatçısıdır. Prezident İlham Əliyev Qarabağı və Şərqi Zəngəzuru “yaşıl enerji” zonası elan edib. Bu torpaqlarımızın malik olduğu bərpaolunan enerji mənbələrinin potensialı Qarabağın və Şərqi Zəngəzurun “yaşıl enerji” mərkəzinə çevriləcəyinə böyük əsas yaradır. Ötən il bu sahədə imzalanan iki sənəd bu gün də geniş müzakirə olunmaqdadır. Belə ki, 2022-ci ilin iyulunda ölkə Prezidenti İlham Əliyev və Avropa Komissiyasının Prezidenti xanım Ursula Fon der Lyayen tərəfindən enerji sahəsində Strateji Tərəfdaşlığa dair Anlaşma Memorandumu imzalanıb. Eyni zamanda, ötən ilin dekabrında Buxarestdə Azərbaycan, Macarıstan, Rumıniya və Gürcüstan Hökumətləri arasında yaşıl enerji sahəsində strateji tərəfdaşlığa dair müvafiq Saziş imzalanıb. Saziş bu ölkələr arasında yaşıl enerjinin ötürülməsi məqsədilə Gürcüstan və Qara dənizdən keçəcək sualtı elektrik enerjisi kabelinin çəkilməsi layihəsinin reallaşdırılmasını nəzərdə tutur.
Dövlət başçısı İlham Əliyevin yanvarın 29-da Macarıstana səfəri Azərbaycanın enerji sektorunda qazandığı uğurların, bərpaolunan enerji sahəsində malik olduğu potensialın təqdimatında əhəmiyyətli rol oynadı. “Bu gün imzalanan strateji tərəfdaşlığın dərinləşməsinə dair Birgə Bəyannamə bir daha bizim strateji tərəfdaşlığımızı təsdiqləyir. Bu, strateji tərəfdaşlığa dair imzalanmış ikinci sənəddir və bir daha onu göstərir ki, həqiqətən Macarıstan və Azərbaycan dost və strateji tərəfdaşdırlar” söyləyən dövlət başçısı İlham Əliyev bildirdi ki, enerji təhlükəsizliyi məsələləri bugünkü dünyada xüsusi əhəmiyyət daşıyır və hesab edirəm ki, dünya gündəliyinin ön sıralarındadır. Azərbaycanın zəngin neft-qaz resursları imkan verir ki, uzun illər - təbii qazla bağlı ən azı yüz il bundan sonra Avropa üçün etibarlı tərəfdaş olsun. Avropa Komissiyasının rəhbərliyi Azərbaycanı məhz belə də adlandırır: etibarlı tərəfdaş. Cənab İlham Əliyev bu məqamı xüsusi qeyd etdi ki, yaxın keçmişdə aşkarlanan böyük yaşıl enerji potensialı da Azərbaycanın önəmini daha da artırır.
Belə bir əminlik də ifadə edildi ki, yaşıl enerji ilə bağlı olan və artıq icra olunan layihələr bizi Avropa üçün daha da yaxın edəcək. Azərbaycanla Macarıstan arasında əməkdaşlığın böyük hissəsi enerji məsələlərinə həsr olunsa da, əməkdaşlıq yalnız bu sahə ilə məhdudlaşmır. Eyni zamanda, nəqliyyat sahəsində çox böyük planlar həyata keçirilir. Dəmir yolları vasitəsilə artıq Macarıstandan Azərbaycana, Azərbaycandan Macarıstana yüklərin ötürülməsinə başlanılıb. Azərbaycan Avrasiyanın önəmli nəqliyyat-logistika mərkəzlərinin birinə çevrilə bilər.
Burada Avropa ölkələri ilə və xüsusilə Avropa İttifaqına üzv dövlətlər arasında ən yaxın tərəfdaşlarımızdan biri olan Macarıstanla əməkdaşlıq üçün çox yaxşı imkanlar var. Azərbaycanın iştirakçısı və təşəbbüsçüsü olduğu enerji, nəqliyyat layihələri ölkələr, xalqlar arasında körpü roluna daim yeniliklər gətirir. Həmçinin xarici siyasətimizin prinsiplərinin dəyişməzliyi, böyüklüyündən, kiçikliyindən asılı olmayaraq bütün dövlətlərlə bərabərhüquqli, qarşılıqlı maraq və hörmət əsasında əlaqələrin qurulması bu sahədə uğurlarımızın davamlı olmasını şərtləndirir. Azərbaycan yeni tərəfdaşları ilə daim diqqətdədir.
Nihad Pənahov,
YAP Tovuz rayon təşkilatının sədri
