Vətən, torpaq məhəbbəti ilə boy atan Vüsal Kazımov 44 günlük haqq savaşımızda baş leytenant rütbəsində canını ona fəda etməklə bu, ilahi sevgiyə əbədiyyət gətirib. Vətən səmasının günəşinə dönüb ölümsüzlüyə qovuşan qəhrəman milyonların könlünə köç edib.
İndi hər dəfə Vüsalın adı çəkiləndə dünyaya göz açdığı Lənkəran rayonu, Yuxarı Nüvədi kəndidə kiçik də, böyükdə hədsiz qürur hissi keçirir. Bir də Vüsal elə bir tarix yazıb ki, təkcə Lənkəran eli deyil, bütün Azərbaycan onun şərəfli ömür yolunu örnək sayır.
Bəli, Vüsalın xatirəsini əziz tutmağı hər bir kəs özünə müqəddəs borc bilir. İndi bu, Vətən sevdalısının adını özündə yaşadan yadigarlar çoxdur. Dövlət tərəfindən şəhadətindən sonra III dərəcəli “Vətənə xidmətə görə” ordeninə, "Vətən uğrunda" , "İgidliyə görə", Xocavəndin, Füzulinin azadlığı uğrunda medallarına layiq görülüb. Həmçinin Azərbaycan Yazıçılar Birliyinin üzvü, Prezident təqaüdçüsü, yazıçı Çinarə Ömrayın ssenarisi əsasında "Vüsal hicrandan acıymış" adlı sənədli film çəkilib. Filmdə şəhid baş leytenant Vüsal Kazımovla bağlı doğmalarının, dostların, tələbə yoldaşlarının, cəbhədəki silahdaşlarının xatirəsi yer alıb. Bu günlər Astara Pedaqoji Kollecində “Vüsal hicrandan acıymış” adlı sənədli filmin təqdimat mərasimi baş tutub. Tədbir Vətən naminə canını fəda edən, xalqı üçün şərəfli bir tarix qoyub gedən şəhidlərin əziz xatirəsini bir dəqiqlik sükutla anılmaqla, dövlət himnin oxunması ilə başlanıb. Ardınca dövlət başçısı, Ali Baş Komandan İlham Əliyevin şəhid ailələrinə göstərdiyi qayğıdan, onlarla görüşündən bəhs edən video çarxın nümayişi tədbir iştirakçılar tərəfində maraqla qarşılanıb.
Tədbirdə çıxış edən şəhid mayor Kamran Fərəcovun həyat yoldaşı, kollecin “Maliyyə-informasiya” şöbəsinin müdiri Nuranə Fərəcova deyib:- Qanı bahasına torpağı Vətən edən Vüsal Kazımov cismən aramızdan gedib. O, xalqı üçün iftixar mənbəyi, qürur yeridir. Vüsal bir də bizlərə Vətəni necə sevməyi, doğma torpağa əsl sahib çıxmağı öyrətdi. Canından artıq sevdiyi Azərbaycan naminə şəhid olan Vüsal millətin kimliyini, mənliyini dünyaya tanıtdırdı. O, hər cür sevgiyə, məhəbbətə layiqdir. Qərinələr keçsə də Vüsalın müqəddəs xatirəsi xalq tərəfindən heç zaman unudulmaz, zaman-zaman böyük ehtiramla anılacaq və şərəfli ömür yolu gələcək nəsillərə həyat məktəbi olacaq.
Astara Şəhər 1 saylı məktəbin direktoru Xədicə Əliyeva çıxışında bildirib ki, şəhid leytenant Vüsal Kazımovun ömür yolu qısa olsa da, İkinci Qarabağ müharibəsində yazdığı qəhrəmanlıq dastanı ilə özündə bütöv bir xalqın qəhrəmanlıq simvolunu yaşadır. Çətin gündə sinəsini Vətənə sipər edib erməni dığaların kabusuna çevrilən Vüsal
Füzuli əməliyyatında, Cəbrayıl, Xocavənd, Şuşa uğrunda gedən şiddətli döyüşlərdə yüksək şəxsi rəşadət və şücaət nümayiş edib. O, müqəddəs bir yolda şəhidlik zirvəsinə ucalıb. Bu şərəfə çatanların ömrü isə əbədi olur. Fəqət, nə qədər ki, müstəqil Azərbaycan var, şəhid leytenant Vüsal Kazımova xalq ehtiramı və məhəbbəti heç vaxt əskilməyəcək.
Lənkəran şəhər Heydər Əliyev Mərkəzinin direktoru Reyhanə Sadıxovanın yazmiş olduğu “Mən ölə bilmədim məni bağışla” şeiri kollecin tyutoru Leyla Kərimlinin ifasında səslənib.
Sonda Şəhid Vüsal Kazımovun atası Astara Pedaqoji Kollecinin direktoru ,professor Kamran Kazımov söz alıb Vüsal kimi bütün qəhrəman oğullarla qürur duyduğunu səmimi bir şəkildə dilə gətirib.
Zəfər Orucoğlu,
Azərbaycan Jurnalistlər Birliyinin üzvü
