Türkiyə-Avstriya matçının qalibi iyulun 6-da Berlində keçiriləcək 1/4 finalda Rumıniya-Hollandiya cütünün qalibi ilə qarşılaşacaq.
Türkiyə millisində Hakan Çalhanoğlu və Səməd Akaydın cəzalı olduqlarından oyunda iştirak etməyəcəklər. Belə ki, hərəyə 2 sarı vərəqə alan bu iki futbolçu bugünkü oyunu buraxacaqlar. Avstriya yışmasında isə Patrick Wimmer cəzalı olduğuna görə sözügedən qarşılaşmada iştirak etməyəcək.
“Ay ulduzlu” komandada əzələ dartılması olan Samet Akaydından başqa zədəli futbolçu yoxdur. Komandada Zeki Çelik, Salih Özcan, Kənan Yıldız, İsmail Yüksek, Mert Günok, Uğurcan Çakır, Mert Müldür, Orkun Kökçü, Kaan Ayhan və Arda Gülər sarı kart görmələri halda növbəti matçda oynamayacaqlar.
Xatırladaq ki, “Ay ulduzlu” komandanın “sükanı arxası”nda 6-sı rəsmi, 5-i yoldaşlıq olmaqla 11 oyun keçirən italiyalı çalışdırıcı 5 oyunda qələbə qazanıb, 4 məğlubiyyət, 2 heç-heçəyə imza atıb.
Avstriya ilə oyunu şərh edən Türkiyə Futbol Federasiyasının sədr müavini Mustafa Eröğüt addım-addım irəlilədiklərini bildirərək turun qalibi olacaqları halda növbəti matçın Berlində olacağını söyləyib: “Dortmundda, Hamburqda oynadıq, Leypsiqdə oynayacağıq. Milli Komandanı daha çox Berlində görmək istəyirik. Mümkünsə, iki dəfə görmək istərdik. Biz bunun üçün çalışırıq. Finalla bağlı arzumuz gerçəkləşərsə, Almaniyanın qarşı tərəfdə olması Berlindəki bu final həyəcanını daha da artıracaq.”
Məlumat üçün bildirək ki, Türkiyə və Avstriya 10-u rəsmi olmaqla ümumilikdə 17 dəfə rəqib olublar. Sözügedən qarşılaşmalardan Türkiyə millisi 7, Avstriya isə 9 dəfə qalib ayrılıb. Bir görüşdə isə "sülh" olub. İki ölkə sonuncu dəfə 2024-cü il martın 26-da Vyanadakı "Ernst Happel" stadionunda yoldaşlıq oyununda qarşılaşıb və “ay ulduzlar” rəqibinə 6-1 hesabı ilə məğlub olub.
Orxan Vahidoğlu, "İki sahil"