“Mən əminəm ki, Mərkəzi Asiya iqtisadi əməkdaşlığı milli iqtisadiyyatlarımız üçün əsas olmasa da, ən azı əsas artım mənbələrindən birinə çevrilə bilər”.

“İki sahil”in məlumatına görə, bunu Qazaxıstan Prezidenti Kasım-Jomart Tokayev “Kazakhstanskaya Pravda” qəzetində dərc olunmuş “Mərkəzi Asiyanın İntibahı: Davamlı İnkişaf və Rifah Yolunda” məqaləsində yazıb.

Dövlət başçısı qeyd edib ki, hazırda region ölkələrinin birgə səyləri və güclü iqtisadi potensial sayəsində Mərkəzi Asiya ticarət, investisiya, elm və innovasiya sahəsində böyük imkanlar məkanına çevrilir: “Dövlətlərimizin ümumi ərazisi 3 milyon 882 min kv.km, əhalisi 80 milyon nəfərdən çox, ümumi daxili məhsul 450 milyard dollar, regionda dünya uran ehtiyatlarının təxminən 20%-i, neftin 17,2%-i, təbii qazın 7%-i var. Kömür istehsalı və elektrik enerjisi istehsalı baxımından Mərkəzi Asiya dünyada müvafiq olaraq 10-cu və 19-cu yerləri tutur.

Tokayevin sözlərinə görə, region ölkələrinin iqtisadiyyatlarının bir-birini tamamlaması onların xarici şoklara qarşı müqavimətini təmin etməyə, ticarət və istehsal tsikllərini şaxələndirməyə imkan verir: “Birgə iqtisadi layihələrin səmərəli həyata keçirilməsi ilə bu proses asanlaşdırıla bilər. Resurs asılılığından tədricən uzaqlaşmaq lazımdır. Bu kontekstdə media, kino, musiqi, dizayn, təhsil və informasiya texnologiyaları sahəsini əhatə edən rəqəmsallaşma və yaradıcı sənaye iqtisadi artım nöqtələrinə çevrilə bilər. Region ölkələrinin bu istiqamətdə birgə layihələrin yaradılması üçün yaxşı potensialı var”.

Məhərrəm Ağalaroğlu, “İki sahil”