Yalçın Canhəsən oğlu Nəsirov Azərbaycan  müstəqil olandan  sonra  Vətənin yaşaması, xalqının xoşbəxtliyi naminə  canını fəda edərək adını tarixə yazıb.  Arzusu  Vətənini  azad, bütöv və güclü görmək olan  Yalçın Nəsirov 23 yanvar 1976-ci ildə Astara rayonu, Sərək kəndində  dünyaya gəlib. Doğma kəndində ota təhsilini   başa vurub,1994-cü ildə ordu sıralarına gedib. Tərtərdə Vətəninə ləyaqətlə xidmət edib. 1995-ci ilin 13-17mart günlərində Azərbaycanın müstəqilliyi təhlükə altında olanda  özünü güllə qabağına verməklə  ağır yaralanıb. Martın 24-də Yalçın aldığı yaradan  Sabunçu rayon xəstəxanasında əbədiyyət dünyasına qovuşub. Azərbaycan  Respublikası Prezidentinin  4 aprel 1995-ci il tarixli 307 saylı fərmanına əsasən Yalçın Nəsirov  ölümündən sonra “Azərbaycanın Milli Qəhrəmanı”  adına layiq görülüb. Astaradakı  Sərək  kənd  orta məktəbi onun adını daşıyır. Oxuduğu  sinifdə  Milli Qəhrəmanın qısa, lakin şərəfli  ömür yolundan bəhs edən guşə yaradılıb. Həmçinin rayonun “Qəhrəmanlar” parkında büstü qoyulub. Belə də astaralılar  öz qəhrəman oğlunu heç vaxt unutmur, onu böyük iftixarla xatırlayır.  

Bu günlərdə isə rayonun  “Ümid” İdman Kompleksində Lənkəran-Astara Regional Gənclər və İdman İdarəsinin təşkilatçılığı  sayəsində  baş tutan  Azərbaycanın Milli Qəhrəmanı Yalçın Nəsirovun xatirəsinə həsr olunmuş mini futbol üzrə Astara rayon açıq turnirinə yekun vurulub.  15 gün davam edən  turnirdə 4 qrup üzrə 16 komanda, ümumilikdə, 192 idmançı  qələbə uğrunda mübarizə aparıb.

Yekun nəticəyə əsasən I yerə Astaranın  “Rüdəkənar”  komandası turnirin birincisi olub. Lənkəranın  ”Mamusta-2” komandası  II yeri qazanıb. ”Mamusta-1” (Lənkəran) komandası isə  III yeri tutub.

Turnirin açılış və təltif etmə   mərasimlərində Azərbaycanın Milli Qəhrəmanı Yalçın Nəsirovun qardaşları Afərin, Möhsün Nəsirovlar, Lənkəran-Astara Regional Gənclər və İdman İdarəsinin Astara rayonu üzrə gənclər və idman sektorunun əməkdaşları, Astara Rayon İcra Hakimiyyətinin şöbə müdiri Turan Həsənzadə, "Ümid" İdman Kompleksinin direktoru Ümidvar Məmmədov iştirak ediblər.

I, II, III yerləri tutan komandalar,  komanda üzvləri Lənkəran-Astara Regional Gənclər və İdman İdarəsinin kubok, medal və diplomlarla , eləcə də təşkilati işlərdə fərqlənən 5 nəfər diplomlarla, eləcə də “Ən yaxşı hücumçu”, “Ən yaxşı qapıçı” “Ümid” İdman Kompleksinin hədiyyələri ilə təltif olunub.

Zəfər Orucoğlu,
Azərbaycan Jurnalistlər Birliyinin üzvü