Riqsdaqa (İsveç parlamenti) təqdim edilən yeni qanun layihəsində İsveç hökuməti vətəndaşlara ibtidai istintaqda və məhkəmədə anonim ifadə vermək imkanı yaratmağı təklif edir. Məqsəd şahidlərin müdafiəsini gücləndirmək, susqunluq ənənəsini pozmaq və bununla da cinayətlərin üstünün açılmasını asanlaşdırmaqdır.

“İki sahil” xəbər verir ki, təklif Ədliyyə Ombudsmanı, Dövlət Məhkəmə İdarəsi və Ədliyyə Şurasının tənqidinə səbəb olub. Qanun layihəsində təklif edilir ki, şahidin və ya onun qohumlarının cinayət qurbanı olması ilə bağlı real risk varsa, anonimlik şərti ilə şahidə ifadə verməyə icazə verilməlidir. Bu, ən azı iki il həbs cəzası gözlənilən əməllər üçün nəzərdə tutulur. “Cinayətkar dəstələr şahidləri hədələyir və susmağa məcbur edirlər. Bu o deməkdir ki, cinayət şəbəkələri ilə bağlı bir çox cinayət araşdırmalarını başa çatdırmaq çətin olacaq. Biz bunu dəyişməliyik. Biz bunu indi edirik”, - deyə ədliyyə naziri Qunnar Strömmer deyib.

Təklif bəzi qurumların kəskin tənqidi ilə üzləşib. “Ədliyyə Şurasının anonim şahidlərlə bağlı təklifi rədd etməsinə baxmayaraq, hökumətin öz işini davam etdirməsi olduqca maraqlıdır. Bu, hüquqi müəyyənliyin ən əsas prinsipinə zidd olan tamamilə yeni ifadə formasıdır. Təqsirləndirilən şəxs həmişə kimin ona qarşı ifadə verdiyini bilmək və özünü müdafiə etmək hüququna malik olmalıdır”, - deyə Vəkillər Kollegiyasının baş katibi Mia Edvall Insulander deyir.

Prokurorluq orqanları da təklifi təqdir edir. “Şahidin anonimliyinə zəmanət vermək bizim üçün həmişə vacib olub. Bu, tez-tez istifadə edəcəyimiz bir şey deyil, lakin bu funksiyanın alətlər komplektimizdə olması vacibdir", - deyə prokurorluqdan bildirilib.

Qəbul olunduğu təqdirdə yeni qanun 2025-ci il yanvarın 1-dən qüvvəyə minəcək.