Azərbaycanın 63 bölgəsində olan itkin ailələrindən 11200-dən çox bioloji nümunələr toplanıb.
“İki sahil” xəbər verir ki, bunu Dövlət Təhlükəsizliyi Xidmətinin Hərbi-Tibb Baş İdarəsinin rəhbəri Rüfət Əliyev “İtkin düşmüş şəxslərin ailələrinin təcrübələri: onların ehtiyaclarının və üzləşdikləri çətinliklərin müəyyən edilməsi və cavablandırılması, əməkdaşlıq və tərəfdaşlıq sahələr mövzusunda beynəlxalq konfransda deyib.
O bildirib ki, həmin materiallar əsasında DNT məlumat bazası formalaşdırılıb: “Hazırda 4000-ə yaxın soydaşımız itkin düşmüş şəxs kimi qeydiyyata alınıb. 2020-ci ildə Ali Baş Komandan İlham Əliyevin rəhbərliyi altında aparılan Vətən müharibəsi və antiterror tədbirlərindən sonra aparılan tikinti işləri və Dövlət Komissiyasının apardığı qazıntılar nəticəsində kütləvi məzarlıqlar aşkar edilib. İtkin düşmüş şəxslərin şəxsiyyətinin müəyyən edilməsində qabaqcıl beynəlxalq təcrübənin öyrənilməsi diqqət mərkəzində saxlanıb. Bütün çətinliklərə baxmayaraq itkin düşmüş şəxslərin şəxsiyyətinin müəyyənləşdirilməsində ciddi irəliləyiş əldə edilib. Xəbərsiz itkin düşnüş şəxslərin müəyyənləşdirilməsi sahəsində Dövlət Komissiyası, BQXK və aidiyyəti qurumlar arasında davam etdirilən əməkdaşlığın hazırki səviyyəsi yüksək qiymətləndirilib.
