Kanadanın Toronto şəhərində fəaliyyət göstərən Azərbaycan Evinin nəzdində Kanada Azərbaycanlı Gənclər Birliyi (Youth Unity of Azerbaijani Canadians) yaradılıb.

“İki sahil” xəbər verir ki, bu barədə Diasporla İş üzrə Dövlət Komitəsi məlumat yayıb.

Bildirilib ki, Azərbaycan Evində baş tutan açılışa dünya şöhrətli azərbaycanlı alim, Əməkdar elm xadimi, Humboldt mükafatı alan ilk azərbaycanlı professor Məsud Əfəndiyev, Ontario əyalətinin keçmiş deputatı, nüfuzlu siyasətçi Reza Moridi və professor İlqar Məmmədov qatılıb. Onlar birliyin yaradılması münasibətilə azərbaycanlı gəncləri təbrik edib və onlara uğurlar arzulayıblar.

Ətraflı

Məsud Əfəndiyev Kanada Azərbaycanlı Gənclər Birliyinin yaradılmasının önəmli və doğru bir addım olduğunu vurğulayıb. O, yeni yaradılan birliyin ölkəmizlə sıx əlaqədə olmasının, eyni zamanda digər ölkələrdə yerləşən Azərbaycan Evlərində fəaliyyət göstərən birliklərlə ortaq tədbirlər, görüşlər keçirməsinin əhəmiyyətindən danışıb.

Azərbaycan Kanadalı Gənclər Birliyinin təşkilatçıları Fərid Məlikov və Fidan Əliyeva qeyd ediblər ki, birliyin əsas hədəfi Kanadada yaşayan azərbaycanlı gəncləri bir araya gətirmək, elmi və digər vacib mövzularla əlaqədar görüşlər həyata keçirməkdir. Yaxın günlərdə gənclərlə bağlı böyük bir tədbirin keçiriləcəyi və bu barədə ictimaiyyətə daha geniş məlumat veriləcəyi də bildirilib.

Görüşdə Məsud Əfəndiyev, Reza Moridi və İlqar Məmmədov elm, siyasət, şəxsi inkişaf haqqında öz dəyərli fikirlərini gənclərlə bölüşüblər.