COP29 çərçivəsində SOCAR-ın SABAH.HUB ilə birgə dəstəklədiyi "Dayanıqlı İnnovasiyalar Çağırışı" mpvzusunda panel müzakirəsi keçirilib. Müzakirə zamanı "Climate Tech" və "CleanTech" sahələrində inqilabi həlləri vurğulanıb.

“İki sahil”in məlumatına görə, SABAH.HUB innovasiya mərkəzinin sədri Rahim Bayramlı, İdarə Heyətinin üzvü, SABAH.fund şirkətinin həmtəsisçisi Abbas Kazımi, İdarə Heyətinin üzvü Fərhad Paşayev çıxış ediblər.

SOCAR-ın prezidenti Rövşən Nəcəf gənclərə fəaliyyətlərində uğurlar arzulayıb.

“Biz yeniliklərə, biz sizə - bütün məqsədlərə daha tez, daha sürətli və daha az vəsaitlə çatmağa kömək edən parlaq zəkalara inanırıq. Mən bir daha sizə iştirakınıza görə təşəkkür edirəm və bilməlisiniz ki, dünən qalib olmamısınızsa bu gün, bu gün qalib olnasanız sabah mütləq olacaqsınız. Ona görə də dayanmayın və bizə kömək olun! Çox sağ olun”, - deyə SOCAR-ın prezidenti qeyd edib.

Məlumat üçün bildirək ki, proqramda 10 startap iştirak edir: "StartupWiseGuys" və SABAH.HUB-un "Climate Tech" kohortundan 5 regional komanda və "CleanTech/Climate Tech" kateqoriyasında yarışan 5 qlobal startap. Hər bir komanda öz ideyalarını təqdim etmək üçün şərait yaradılıb.

Daha sonra tədbirdə investorların qiymətləndirilməsi aparılıb, startaplara SABAH.fund və iştirak edən digər vençur kapitalı və "Angel Investors" müsabiqəsi vasitəsilə potensial investisiya almaq imkanı verilib.

Sonda SOCAR-in prezidenti Rövşən Nəcəf qalib seçilən komandaları təltif edib.

Orxan Vahidoğlu, "İki sahil"