Xəzər dənizinin iqlim dəyişikliklərinin təsirlərinə həssaslığı hər gün müşahidə edilir.

“İki sahil” xəbər verir ki, bunu BMT-nin COP29-da İqlim dəyişmələri üzrə yüksək səviyyəli çempionu Nigar Arpadarai COP29 çərçivəsində keçirilən "Xəzər dənizi və davamlı inkişaf: Ətraf mühitin mühafizəsi" adlı forumda deyib.

Onun sözlərinə görə, Xəzər dənizi Azərbaycan və region üçün həyati əhəmiyyətli bir sərvətdir:

"Çünki sahilyanı dövlətlərin ən böyük təbii ehtiyatıdır, biomüxtəlifliyimizi, iqtisadiyyatımızı və icmalarımızı dəstəkləyir. Bir tərəfdən, Xəzər dənizi nəqliyyat qovşağıdır, bir sıra beynəlxalq nəqliyyat marşrutlarının bir hissəsidir. Digər tərəfdən, Xəzər dənizi ətraf ölkələr üçün biomüxtəliflik mənbəyi, bu dövlətlərin iqlim sistemləri və ekosisteminin çox vacib hissəsidir".

N.Arpadarai Xəzər dənizinin qapalı dəniz olduğundan ekoloji tarazlığının çox asanlıqla pozulmasına da toxunub:

"COP29 kontekstində qlobal, regional və milli gündəmlər var. Xəzər dənizi ətrafındakı ölkələrin birləşməsi, ümumi baxış və iqlim gündəliyinin müəyyənləşdirilməsi üçün fürsət var. Əgər hər şeyi düzgün etsək, təkcə iqlimə və ətraf mühitə deyil, həm də iqtisadiyyata müsbət təsir göstərəcəyik. Qeyri-dövlət subyektlərinin, o cümlədən universitetlərin Xəzər dənizinin iqlim davamlılığına nail olmağa kömək edəcək davamlı həllər hazırlamaqda rolu həyati əhəmiyyət kəsb edir".