Ötən gündən başlayaraq ölkənin şimal-qərb bölgəsində güclü küləkli hava şəraiti müşahidə olunur.

Zaqatala Rayon Fövqəladə Hallar Komissiyasından “İki sahil”ə verilən məlumata görə, güclü külək rayon ərazisində bir sıra fəsadlara yol açıb. Belə ki, şəhərin Vasif Qurbanov küçəsində beşmərtəbəli yaşayış binasının dam örtüyünü külək uçurub. Eyni zamanda, şəhərin bir sıra ərazisində elektrik naqilləri qırılıb, elektrik enerjisinin verilməsində fasilə yaranıb.

Güclü külək rayonun bir sıra yaşayış məntəqələrində də müşahidə edilib. Muxax, Yuxarı Tala, Aşağı Tala, Göyəm, Masex, Qımır və daha bir neçə yaşayış məntəqəsində elektrik enerjisinin verilməsində fasilə yaranıb.

Komissiyadan bildirilib ki, aidiyyəti qurumlar fəsadların aradan qaldırılması məqsədilə ərazidə iş aparır.

Oğuz rayonunda da güclü küləkli hava müşahidə olunur. Rayon Fövqəladə Hallar Komissiyasından verilən məlumata əsasən, güclü külək irigövdəli ağacları Oğuz-Bayan avtomobil yoluna aşırıb. Nəticədə nəqliyyat vasitələrinin hərəkətində bir müddət fasilə yaranıb. Əraziyə dərhal rayon kommunal xidmət müəssisəsinin əməkdaşları cəlb edilərək, aşan ağac kəsilərək ərazidən götürülüb və nəqliyyatın hərəkəti bərpa olunub.

Bundan başqa, külək nəticəsində elektrik naqilləri və internet xətləri də qırılıb. Hazırda rayonun bir hissəsində elektrik enerjisinin və internetin verilişində fasilə yaranıb. Səhər saatlarından etibarən aidiyyəti qurumların əməkdaşları fəsadların aradan qaldırılması istiqamətində iş aparır.

Hazırda Oğuz şəhərinə verilən elektrik enerjisi və internet bərpa olunub. İşlər davam etdirilir.

Güclü külək Qəbələdə də müşahidə olunub və rayonun elektrik təsərrüfatına, eləcə də digər infrastruktura ziyan vurub.

Qəbələ Rayon Fövqəladə Hallar Komissiyasından məlumat verilib ki, çox sayda ağac qırılıb, bir neçə binanın dam örtüyü uçub. Şəhər ərazisində bir sıra yaşayış məntəqələrində elektrik dirəkləri aşıb, elektrik naqillərinə ciddi ziyan dəyib, rayonda enerjinin verilməsində fasilələr yaranıb.

Səhər saatlarından başlayaraq fəsadların aradan qaldırılması istiqamətində iş aparılır.