Bakı Şəhər Gənclər və İdman İdarəsində (BŞGİİ) 2 fevral – Azərbaycan Gəncləri Günü münasibətilə xüsusi mükafatlandırma mərasimi keçirilib.

BŞGİİ-nin mətbuat xidmətindən "İki sahil"ə verilən məlumata görə, tədbirin açılış mərasimi Dövlət Himninin səsləndirilməsi ilə başlayıb. Daha sonra Ümummilli Lider Heydər Əliyevin və ölkəmizin müstəqilliyi, suverenliyi, ərazi bütövlüyü uğrunda canını qurban vermiş şəhidlərimizin xatirəsi bir dəqiqəlik sükutla yad edilib.

Ardınca iştirakçılar, Ulu Öndər Heydər Əliyevin imzaladığı Fərmana əsasən təsis edilən 2 Fevral - Azərbaycan Gəncləri Gününün tarixçəsi ilə bağlı videoçarxı izləyiblər.

BŞGİİ-nin rəisi Dənyar Teymurlu gəncləri bu münasibətlə təbrik edib, onların müstəqil dövlətimizin qurulmasında, onun qorunmasında və inkişafında önəmli rol oynadığını vurğulayıb. O, qeyd edib ki, gənclərin beynəlxalq aləmdə tanıdılması, onların istedadlarının inkişaf etdirilməsi və müxtəlif sahələrdə uğurlar qazanması üçün müvafiq proqramlar həyata keçirilir. Onları fəal olmağa və yeni təşəbbüslərlə çıxış etməyə çağırıb.

Sonra söz gənclərə verilib. Onlarla fikir mübadiləsi aparılıb, təklif və iradları dinlənilib.

Sonda gənclər cəmiyyətdəki aktivliyi, sosial layihələrdəki iştirakları və əldə etdikləri uğurları nəzərə alınaraq mükafatlandırılıblar.